اسلام آباد۔ 05 ستمبر (اے پی پی) بنجائی وزیر چاگڑدی بدلی سینیٹر شیری رحمان تون امریکی ڈل اوڑدہی کرے۔ ہراٹی نوکاپ آن زہمی علاقہ غاتیٹی برجا کمکی سرجزآتا بارواٹ گپ وتران کننگا، امریکی کانگریس نا باسک شیلا جیکسن لی ڈل انا کماشی ءِ کریکہ وخت اس کہ کانگریس نا باسک آک ٹام سوزی و آل گرین آن بیدس پاکستان اٹی امریکہ نا سفیر ڈونلڈ بلوم ئسک ہم اوار ئسر۔ وزارت موسمیاتی بدلی نا کنڈآن جاری بیان نا رداٹ امریکی ڈل ءِ نوکاپ آن زہمی علاقہ غاتیٹی کمکی سرجز آتون اوار زہمی تا بحالی کن درکار امداد نا بارواٹی ہم معلومدار کننگا۔ بنجائی وزیر ڈل ءِ پارے کہ نوکاپ آن 33 ملین بندغ زہمی مسنو وخت اس کہ ملک انا سویلی علاقہ غاک داسہ ہم دیر اٹی ءُ ہرا انسانی جان جوڑی کن خطرہ اسے۔ اوپارے کہ دیر آن ودی مروک آ ناجوڑی تا سوب آن نن ہیلتھ ایمرجنسی نا کنڈآ ہِننگ اُن، نوکاپ نا سوب آن مون آ بروک آ تنکی تون مون تننگ کن دمدستی امداد نا گرج ءِ۔ داوخت آ امریکی ڈل نوکاپ و پِر تا سوب آن نہادی جان تا زیان آ است ہسونی نا درشانی ءِ کرے۔ ڈل بشام نا بھسکاری تیا گڑتی نا درشانی ءِ کرسا مشکل وخت اٹی پاکستان تون پورو کمکاری کننگ کن عزم انا درشانی ءِ کرے۔
