قمبر شہداد کوٹ۔ 05 ستمبر (اے پی پی) وزیراعظم محمد شہباز شریف پارینے کہ حکومت نوکاپ زہمی تیکن امداد نا زر ءِ 28 ارب آن ودفسا 70 ارب روپئی کننگ نا فیصلہ کرینے، ہر زہمی خاہوت اسکان شفاف وڑاٹ امداد سرمریک۔ نوکاپ آن فصل آک بھس مسنو، مخلوق بے اُرا مس، جہانی برادری نا کنڈآن امداد نا منت واری ءِ ہرفنہ، دا وخت سیاست نا اف نوکاپ زہمی تیکن اواری اٹ کاریم کروئی مریک۔ دوشنبے نادے آ قمبر شہداد کوٹ اٹی نوکاپ زہمی تیکن جوڑ کروک آ کمکی کیمپ نا دورہ نا وخت آ گپ وتران کرسا وزیراعظم پارے کہ نوکاپ آن زہمی علاقہ نا فضائی جاچ ءِ ہلکونن، ہر کنڈآ دیر ہی دیر ءِ۔ نوکاپ آن بھاز بھسکاری مسنے۔ سندھ حکومت زہمی تا کمک کن دے و نن کاریم کننگ اٹی ءِ۔ بنجائی و صوبائی حکومت آک اواری اٹ زہمی تا کمک ءِ کیرہ۔ وزیراعظم پارے کہ حکومت نوکاپ آن زہمی خاہوت آتے 25 ہزار روپئی نا امداد نا چرجوئی ءِ بلوچستان آن بناکرے۔ غٹ زہمی علاقہ غاتیٹی امداد کن 28 ارب روپئی جتا کننگاسس ولے نوکاپ آن زہمی مروک آ خاہوت آتا کچ بھاز زیات ءِ، ہنداخاطرآن بنجائی حکومت دا زر ءِ 70 ارب روپئی اسکان ودفنگ نا فیصلہ کرینے۔ شفاف وڑاٹ دا کمکی زر ءِ بینظیر انکم سپورٹ پروگرام نا کمک اٹ بشخنگک۔ وزیراعظم پارے کہ نوکاپ آن کرپاس، برنج واِلار تون اوار چندی فصل آتا بے تحاشہ نسخان مسنے۔ سندھ نوکاپ آن بھاز زیات زہمی مسنے۔ یواے ای، قطر، ترکی، سعودی عرب، چین ، امریکہ، ایران تون اوار غٹ سنگت ملک آتا منت واری ءِ ہرفیوہ ہرافک پاکستان نا دا مشکل ساہت اٹی بھاز کمک ءِ کرینو۔ ہر دے چندی ملک آتا جہاز آک کمکی گڑااتسا دڑنگ انگ ءُ۔ ترکی نا کنڈآن کمکی گڑاتیان پُر 4 ریل روانہ کننگانے۔ پرنس کریم آغا خان نا مار ہم 10 ملین ڈالر نا امداد نا پڑو کرینے۔ چین ہم کمکی زر ءِ ودفینے۔ وزیراعظم پارے کہ زہمی علاقہ غاتیٹی ریلیف و بحالی نا سرجز آتیکن پاکستان نا فوج پبی کمک کننگ ءِ۔ دا مشکل ساہت اٹی سیاست بایدے کننگپ غٹ ءِ اواری اٹ زہمی تیکن کاریم کروئی مریک۔ داکان مست وزیراعظم نوکاپ زہمی تیٹی کمکی چیک بشخا۔ وزیراعظم ءِ قمبر شہداد کوٹ اٹی نوکاپ آن مروک آ نسخان و ریلیف و بحالی نا سرجزآتا بارواٹ حوال تننگا۔ وزیراعظم ءِ پاننگاکہ منچھر جھیل انا لیول بھاز ودانے۔ جوان انگا ہند آتیا بند آتے پرغسا دیر انا کچ ءِ کم کننگانے۔ علاقہ ٹی دیر ءِ کشنگ کن بنجائی حکومت نا کمک نا گرج ءِ۔ نوکاپ آن فصل آتا بھاز نسخان مسنے وخت اس کہ کچہ انگا ہند آک تمانو۔ دیر انا سلنگ آن دینی مرض تالان مننگ ءِ۔ بھاز انگا علاقہ غاتیان ڈغاری رابطہ کشکنگ نا سوب آن کمکی سرجز آتیٹی مشکل مون تروک ءِ۔ زہمی تسکان تیار کن و خور سرکننگ نا کوشست کننگ انگ ءِ۔ گیشتر رقبہ غا نوکاپ آن 7 تحصیل و 9 آن 13 لکھ بندغ زیات زہمی مسنو۔ وزیراعظم ءِ زہمی علاقہ نا فضائی معائنہ نا وزیراعلیٰ سندھ سید مراد علی شاہ و وزیر خارجہ بلاول بھٹو زرداری نوکاپ آن مروک آ بھسکاری و کمکی سرجزآتا بارواٹ حوال تسر۔
