کوئٹہ۔ 05 ستمبر (اے پی پی) کسان اتحاد پاکستان نا چیئرمین خالد حسین پارینے کہ بلوچستان تون اوار مچ آ ملک اٹی طوفانی پِر و نوکاپی دیر تیان کشت وکشار ءِ50 درسد آن نسخان رسینگانے حکومت بزغرآتے بے سود کشاری وام و مفت بج و کھد انا فراوانی ءِ پک کے تانکہ زمیندار دُوارہ تینا نت تیا سلنگ کے، شہدا لسبیلہ نا یات اٹی اینو (6) ستمبر آ ہندی ہوٹل اٹی دود اس اڈ ہلیک ہراٹی شہید آتا خاہوت آتیکن ڈغار نا کاغد فراوان و پِر تا زہمی تیکن بزغر فنڈ یکجا کینہ۔ داہیت ءِ او تینا دفتر اٹی اوڑدہی کروک آ بزغر آتا اسہ ڈل اسے تون گپ وتران کرسا پارے۔ اوپارے کہ ساڑی آ بشام نا طوفانی پِر و نوکاپی دیر تیان ملک اتون اوار بلوچستان اٹی 50 درسد کشت وکشار بھس مسنے و زمیندار آتا ٹماٹر، پیماز تون اوار ایلو کشاری فصل و باغک پورو بھس مسنو۔ اوپارے کہ بیرہ بلوچستان اٹی 2 لکھ ایکڑ آ سلوک فصل و باغ تے نسخان رسینگانے بنجائی و صوبائی حکومت آتے مرے کہ او دمدستی وڑاٹ زمیندار و بزغر آتے مروک آ نسخان تا پوروی کن اوفتے بے سود کشاری وام ایتر ، بلوچستان نا زمیندار آتا بجلی نا بل ءِ معاف و اوفتے بج و کھد انا فروانی ءِ پک کیر تانکہ زمیندار آک دُوارہ تینا نت تیا سلنگ کیر۔ اوپارے کہ کسان اتحاد پاکستان ءِ پت اٹ ہلسا پیشن نا ملک آن سوزی و ایلو گڑا دوئی کے تانکہ داجاگہ نا زمیندار آتے پین نسخان تیان بچفنگ مرے انتئے کہ ہراگڑاتا داڑے کاختی ءِ اوفتا درآمد آن زمیندار آتے کروڑ آ روپئی نا نسخان تون مون تروئی مننگ کیک۔ اوپارے کہ کسان اتحاد پاکستان نا کنڈآن اینو (6 ستمبر) سے شنبے نادے آ لسبیلہ ٹی نوکاپ زدگان تا کمک اٹی ہیلی کیپٹر شکست اٹی شہید مروک آ پاک فوج انا آفیسر و کارندہ غاتا یات اٹی ہندی ہوٹل اٹی دود اس اڈ ہلیک ہرانا مہمان خاص وزیراعلیٰ بلوچستان میر عبدالقدوس بزنجو مریک ۔ داوخت آ کسان اتحاد پاکستان ہیلی کیپٹر شکست اٹی شہید مروک آ پاک فوج انا آفیسر و کارندہ غاتا فی خاہوت ءِ کوئٹہ نا علاقہ قطبی ہنہ و کرک اٹی 10 ایکڑ ڈغار نا کاغد آتے دوٹی ایتک وخت اس کہ نوکاپ آن زہمی تیکن کسان اتحاد تینا کمک تینٹ نا رداٹ فنڈ ہم یکجا کیک تانکہ زہمی تا وخت آ امداد ءِ پک کننگ اٹ کمک ملنگ کے۔
