اسلام آباد۔ 02 ستمبر (اے پی پی) وزیراعظم محمد شہباز شریف پارینے کہ ترکیہ نا کنڈآن نوکاپ نا زہمی تا وخت آ کمکاری ءِ قدر انا نظراٹ ہرنہ، دا گام ہڑتوم آ ملک آتا نیام اٹ خڑکی برادرانہ تعلقداری تا درشانی ءِ ، نوکاپ و پِر تیان اخس بھسکاری مس ہموخس تینا مچ آ زند اٹی خنتنون، سنگت ملک آتا کمک اٹ اونا مقابلہ ءِ کینہ۔ جمعہ نادے آ وزیراعظم نوکاپ زدگان آتون یکجہتی نا درشانی ءِ کننگ کن بروک آ ترکیہ نا ڈل اتون گپ وتران کرسا وخت آ امداد آ ترکیہ نا منت واری ءِ ہرفے۔ داوخت آ ترکیہ نا ڈل آفت زدہ پاکستان تون سلنگ نا عزم انا درشانی ءِ کرے۔ وزیراعظم محمد شہباز شریف تون ترکیہ نا وزیر داخلہ سلیمان سوئیلو نا کماشی ٹی ترکیہ نا ڈل اوڑدہی کرے ہراٹی پاکستان نا نوکاپ نا زہمی تتون ترکیہ نا حکومت و الس نا ہڑزخواہی و یکجہتی نا جوزہ غاتا درشانی ءِ کننگا۔ سلیمان سوئیلو ملک انا غٹ بشخ خاص وڑاٹ بلوچستان، سندھ، خیبرپختونخوا و سویلی پنجاب اٹی بھسکاری طوفانی پِر و نوکاپ آن زہمی الس نا ریسکیو و ریلیف و بھس مروک آ انفراسٹرکچر نا بحالی کن وزیراعظم شہباز شریف نا کماشی ٹی حکومت نا پبی کمکی کارروائی تا ستاءِ کرے۔ اوخاص وڑاٹ بے نظیر انکم سپورٹ پروگرام نا رداٹ فی زہمی خاہوت ءِ 25000 روپئی نا ہلہلہ ئی زر انا فراوانی آ حکومت نا ستاءِ کرے۔ اودانغد زر انا گدریفنگ نا پروگرام ءِ آخبتی بنداو تیا چلیفنگ کن پبی کمک فراوان کننگ نا سلاہ پیش کرے تانکہ نوکاپ زہمی تا زیات آن زیات کمک ءِ کننگ مرے و نوکاپ آن پد راجی کہول آ گمانی نسخان تیان بچنگ مرے۔ سلیمان سوئیلو ترک حکومت و الس نا کنڈآن حکومت پاکستان نا امداد و بحالی نا کوشست آتیٹی مالی کمک کننگ نا تینا پکا عزم انا درشانی ءِ کرے۔ وزیراعظم شہباز شریف تباہ کن قدرتی آفت نا داساہت اٹی پاکستانی الس کن ہمدردی نا جوزہ و مخ تفی آ ترک سرکڑدہ و الس نا منت واری ءِ ہرفسا پارے کہ ترکیہ تون ننا تعلقداری تے یکتا اہمیت دوئی ءِ، او ننا سنگت و ایلم ملک ءِ۔ 27اگست آ ترکیہ نا صدر رجب طیب اردوان کنے فون کرسا نوکاپ آن مروک آ جانی و مالی نسخان تیا ہڑزخواہی و ہمدردی نا درشانی ءِ کرسا پورو کمکاری نا باور کرفے۔ نن ترکیہ نا الس نا منت وار اُن ہرافک مدام مشکل وخت اٹی پاکستان نا پبی کمک ءِ کرینو۔ ترکیہ نا کاروباری تپہ و ایلو ادارہ غاتا کنڈآن ہم کمکی گڑا دوئی مسنے۔ وخت آ کمک آ ترکیہ نا منت واری ءِ ہرفنہ۔ ترک صدر تون ٹیل فون کال آن دمدستی پد امداد گڑا اتسا ترکیہ غان ہراڑے پاکستان آ سرمننگ بناکرینے۔ 2 ریل ہم گڑااتسا بننگ ءُ۔ اوننے تمبو، دوائی، خور اتون اوار پین گڑاتسر ہرافتے نن زہمی تیٹی بشخنگ اُن۔ وزیراعظم پارے کہ ہر چار آ صوبہ، گلگت بلتستان و آزاد کشمیر اٹی طوفانی پِر ونوکاپ آن گڑاس علاقہ غاک زہمی مسنو۔ داپِرک 40 سال اٹی غٹ آن زیات ئسر۔ اوڈل انا پاکستان آ بننگ آ منت واری ءِ ہرفسا پارے کہ دا اسہ شاندار ءُ کلہو اسے۔ پاکستان نا الس خیرخواہی نا دا جوزہ غاتا ستاءِ کیک۔ اوترک صدر رجب طیب اردوان کن نیک است خواہی نا درشانی ءِ کرے۔ اوڈل ءِ پارے کہ نوکاپ و پِرتیان 300 چناتتون اوار اسہ ہزار بندغ زوال کرینو۔ لکھ آ مخلوق بے اُرا و بے چھت آن نن تے گدریفنگ آ بیوس ءُ۔ لکھ آ ایکڑ آ سلوک فصل آتے نسخان رسینگا۔ لائیو اسٹاک ءِ بھاز نسخان رسینگا۔ ای تینا زند اٹی داخہ بھسکاری خنتنوٹ۔ اوداعزم انا درشانی ءِ کرے کہ ترکیہ تون اوار سنگت ملک آتا کمک اٹ نن نوکاپ زہمی تا بحالی ٹی سرسہب مرینہ۔
