اسلام آباد۔ 02 ستمبر (اے پی پی) وزیراعظم محمد شہباز شریف تون پاکستان نا دورہ غا بروک آ ترکیہ نا وزیر داخلہ سلیمان سوئیلو، ترکیہ نا وزیر چاگڑدی، اربنائزیشن و موسمیاتی بدلی، مرات کورم ، چیئرمین ترک ڈیزاسٹراینڈ ایمرجنسی مینجمنٹ، ترک کم خڑچ ہاؤسنگ ایجنسی نا ڈائریکٹر جنرل و اوڑتون اوار ڈل اوڑدہی کرے۔ وزیراعظم نوکاپ آن مروک آ جانی و مالی نسخان تیا ہمدردی و ہڑزخواہی نا درشانی ءِ کننگ آ صدر رجب طیب اردوان نا است انا حب اٹ منتواری ءِ ہرفے و داآفت تون مون تننگ و ہرممکن کمک فراوان کننگ کن ترکیہ نا پاکستان تون کمکاری نا عزم انا ستاءِ کرے۔ وزیراعظم داہیت ءِ ستاکڑزوک گوندا کہ صدر اردگان نا فون کال آن دمدستی پد ترکیہ نوکاپ زدگان تیکن تمبو، کنوئی آ گڑا، دوائی و ہلہلہ ئی کمکی گڑاتا دروشم اٹ پاکستان آ امداد گدریفے۔ داتم اسکان 11 ترک فوجی جہاز و 2 گڑاغان پُر ریل پاکستان آ روانہ مسنے۔ وزیراعظم 2005 نا زمی جمب و 2010 نا نوکاپ اٹی ترکیہ نا کنڈآن پاکستان کن کمک نا ذکر ءِ کرسا داہیت آ زور شاغا کہ ترکیہ و پاکستان’’ است جون اِرا است ءُ‘‘ و اومدام مشککل وخت اٹی اسہ ایلو تون تفینو۔ ڈل ءِ نوکاپ آن مروک آ بھسکاری آن معلومدار کرسا وزیراعظم پارے کہ پاکستان ءِ ملک اٹی غذائی بے رکھی نا خطرہ ءِ، انتئے کہ نوکاپ آن لکھ آ ایکڑ آ فصل آک بھس مسنو۔ وزیراعظم نوکاپ آن زہمی انفراسٹرکچر نا پوسکن تفنگ و بحالی نا ریسہ، مخلوق نا روزگار نا نسخان، خور انا کمتی و راجی و اقتصادی بے رکھی نا سوب آن ودی مروک آ چیلنج آتا مون ءِ توننگ کن ترکیہ نا پبی کمکاری نا اومیت نا درشانی ءِ کرے۔ ترک وزیر داخلہ سلیمان سوئیلو پاکستان اٹی ساڑی آ بشام و نوکاپ اٹی نہادی جان تا زیان و نہادی ملکیت آتا بھسکاری آ صدر اردگان تون دلی ہڑزخواہی نا درشانی ءِ کرے۔ اوداہیت آ زور شاغا کہ ترکیہ نوکاپ زہمی تے ڈغاری و فضائی کسر آتے اٹ کمک فراوان کننگ نا بست وبندکرے۔ اومستی پارے کہ اینو جمعہ نا نماز اٹی ترکیہ ٹی مخلوق تینا پاکستانی ایلم وایڑھ تیکن دعا کیک و مستی کمک ہم فراوان کیک۔ ترک وزیر پارے کہ صدر اردگان نا پارت آتا رداٹ، ترکیہ نا قدرتی آفت آتون مون تروک آ تعلقدار ادارہ غاک پاکستان نا گرج آتا رداٹ پین کمک فراوان کننگ کن تیار ءُ۔ وزیر داخلہ سوئیلو نا کماشی ٹی ترکیہ نا ڈل ملک اٹی ساڑی آ نوکاپ نا رداٹ یکجہتی و مخ تفی نا درشانی نا وڑاٹ پاکستان نا دورہ ءِ کننگ ءُ۔ ڈل نوکاپ آن زہمی علاقہ غاتا فضائی دورہ ءِ ہم کیک۔
