اسلام آباد۔ 02 ستمبر (اے پی پی) بنجائی وزیر ڈٹ بندی شونداری و اصلاحات و خصوصی گام گیج احسن اقبال پارینے کہ نوکاپ آن سندھ بلوچستان نا صوبہ غاک غٹ آن زیات زہمی مسنو، بھلا پِرآک جانی و مالی نسخان نا سوب مسنو، حکومتی وخت آ گام گیج آن جانی نسخان نا شدت نا مون ءِ توننگانے۔ داخیال آتا درشانی ءِ او جمعہ نا دے آ فلڈ ریلیف سینٹر این ڈی ایم اے ٹی ترکیہ نا وزیر داخلہ سلیمان سوئیلو ءِ حوال ترسا کرے۔ داوخت آ بنجائی وزیر ڈٹ بندی و شونداری و چیئرمین فیڈرل ریلیف کمیٹی پروفیسر احسن اقبال ساڑی آ نوکاپ آن مروک آ نسخان تیان معلومدار کرے۔ دیوان اٹی بنجائی وزیر داخلہ رانا ثناء اللہ ، ووزیر موسمیاتی بدلی شیری رحمان ئسک ہم ساڑی ئسر۔ بنجائی وزیر ترکیہ ڈل ءِ معلومدار کرے کہ پاکستان اٹی ہندا سال 500 درسد ودکی پِر مس۔ موسمیاتی بدلی نا اثرآتا سوب آن کم پِر تا علاقہ غاتیٹی زیات پِر مس و ملک ءِ نوکاپی حالیت آتون مون تروک مس۔ اوپارے کہ پاکستانی الس ترکیہ نا الس و حکومت نا منت وار ءِ کہ او مشکل نا داساہت اٹی ننتون تفے۔ نوکاپی حالیت آتیان ترکیہ ڈل ءِ معلومدار کرسا احسن اقبال پارے کہ داوخت آ پاکستان ءِ غٹ آن زیات گرج زہمی تا آبادکاری و انفراسٹرکچر نا بحالی ءِ۔ داوخت آ ترکی نا کنڈآن آبادکاری و غذائی اجناس فراوان کننگ نا پیشکش کننگا۔
