کوئٹہ۔ 02 ستمبر (اے پی پی) سیکرٹری کشت وکشار بلوچستان امید علی کھوکھر، ڈائریکٹر جنرل محکمہ کشاری انجینئرنگ بلوچستان سید بشیر احمد آغا، ڈائریکٹر جنرل ایگریکلچرل بلوچستان عبدالوہاب کاکڑ و زمیندار ایکشن کمیٹی نا جنرل سیکرٹری عبدالرحمان بازئی ئسک پارینو کہ بلوچستان اٹی ساڑی آ نوکاپ و پِر تیان بھلو کچ اسے آ کشاری نسخان مسنے بنجائی و صوبائی حکومت آک زمیندار آتے بروک آ فصل اکن خولم، دال، روغنی اجناس نا بج و کھد انا فراوانی کن گام گیج کیر، ایم ایم ڈی نا آفیسر و عملہ ساڑی آ پِر و نوکاپ نا حالیت آتیٹی گچین کارکڑد نشان تسر ہراڑآ اوفتے خراج تحسین پیش کینہ، بلوچستان نا زمیندار آتے اینخو نا سال 50 درسد رعایتی نرخ آتیا 188 گرین ٹریکٹر فراوان کننگک وخت اس کہ 1200 ٹریکٹر آتا ہلنگ کن اسہ سمری اس ہم وزیراعلیٰ ءِ گدریفنگانے۔ داہیت ءِ اوفک محکمہ کشت وکشار نا کنڈآن بلوچستان نا زمیندار آتے 50 درسد رعایتی نہاد آ گرین ٹریکٹر آتا چابی تننگ نا دود آن تران کرسا پاریر۔ سیکرٹری کشت وکشار امید علی کھوکھر پارے کہ جون آن بناکروک بشام نا پِر تیان 19 جولائی اسکان 52 ارب روپئی نا کشاری نسخان مس وخت اس کہ داتم اسکان پِر تیان مروک آ نسخان تا کساس 98 ارب روپئی آن زیات ءِ و صوبہ ٹی کشت وکشار پورو وڑاٹ بھس مسنے۔ اوپارے کہ جوائنٹ سروے ٹیم 25 اگست آن کشت وکشار نا بشخ اٹی مروک آ نسخان تا سروے نا بناءِ کرینے، سروے ٹیم اٹی ڈپٹی کمشنر، محکمہ کشت وکشار، پاک فوج انا آفیسر و ایلو ادارہ غاتا آفیسر آک اوار ءُ۔ اوپارے کہ ساڑی آ پِر و نوکاپی دیر تیٹی محکمہ کشاری انجینئرنگ نا آفیسر و عملہ تینا خذمت ءِ جوان وڑاٹ سرتسر ہراڑآ اوفک خراج تحسین نا حقدار ءُ۔ اوپارے کہ جون انا تُو آن پِرک بناکریر و مسہ تُو آن محکمہ کشت وکشار اٹی ایمرجنسی نافذ ءِ و غٹ عملہ و آفیسر آتا چھٹی تے منسوخ کننگاسس۔ اوپارے کہ داوخت آ محکہ کشت وکشار ءِ بنجائی یا صوبائی حکومت نا کنڈآن ہچ ءُ ودکی فنڈ اس تننگ تنے۔ اوپارے کہ محکمہ کشت وکشار نا موبائل ورکشاپ آتیکن 23 ملین روپئی منظور کرفینن اوکان پد بلڈوزر آتا جوڑ جاڑ داسہ ہر ضلع ٹی ممکن مننگ کیک۔ ڈائریکٹر جنرل محکمہ کشاری انجینئرنگ بلوچستان سید بشیر احمد آغا پارے کہ محکمہ کشاری انجینئرنگ بلوچستان تون داوخت آ 317 بلڈوزر ءُ ہرا فیلڈ آ کاریم کننگ ءُ۔ اوپارے کہ بلوچستان نا زمیندار آتیکن صوبائی وزیر کشت وکشار میر اسداللہ بلوچ نا کوشست آتیان صوبائی کابینہ صوبہ نا نیزگار زمیندار آتیکن 670،000 بلڈوزر گھنٹہ غاتا زر تسنے ایلو 510،000 گھنٹہ غاتا زر ءِ زوت تننگک دا بلڈوزرگھنٹہ غاتیان کم و ود اسہ لکھ ایکڑ کشاری ڈغار ءِ دسنگ کن بحال کننگ مریک۔ اوپارے کہ وزیراعلیٰ بلوچستان و صوبائی وزیر کشت وکشار صوبہ ٹی کشت وکشار نا مون آ دننگ کن سالانہ شونداری اسکیم 2022-23ء نا رداٹ زمیندار آتے 595 لیزرلیولر نا 50 درسد رعایتی نہاد آ فراوانی نا اسکیم منظور کرینو لیزر لیولر نا کمک اٹ زمیندار آتا صفر ڈگری آ آواری اٹ آبپاشی ٹی 30 درسد دیر انا بچت مریک لیز رلیولر نا بشخنگ کن تعلقدار ضلع نا کشاری انجینئر نا دفتراٹی درخواست جمع کرفنگ مریک لیزر لیولر نا بشخنگ نا عمل تعلقدار ضلع نا کشاری انجینئر نا کماشی ٹی جوڑ کروک کمیٹی نا کمک اٹ کننگک۔ اوپارے کہ صوبائی حکومت صوبہ ٹی کشت وکشار نا مون آ دننگ کن سالانہ شونداری پروگرام سال 2020-21اٹی 578 ٹریکٹر و 2021-22اٹی 234ٹریکٹر بشخا اینخو مالی سال اٹی 188 ٹریکٹر 50 درسد رعایتی نہاد آتیا زمیندار آتے فراوان کننگک۔ ڈائریکٹر جنرل ایگریکلچرل بلوچستان عبدالوہاب کاکڑ پارے کہ بلوچستان اٹی ساڑی آ طوفانی پِر و نوکاپی دیر تیان 1 لکھ 90 ہزار ایکڑ رقبہ غا سلوک فصل، باغ و 15800 ٹیوب ویل، تلاپ و سولر سسٹم ءِ نسخان رسینگانے ہرافتا کساس 98 ارب روپئی آن زیات ءِ۔ اوپارے کہ بنجائی و صوبائی حکومت بلوچستان اٹی بروک آ ربیع نا فصل آتیکن زمیندار آتے دال، روغنی اجناس ، خولم و ایلو فصل آتا بج، کھد و ایلو مالی کمکاری نا فراوانی ءِ پک کیر تانکہ کشت وکشار نا بشخ اٹی مروک آنسخان تا پوروی مننگ کے۔ اوپارے کہ صوبائی وزیر کشت وکشار میر اسد بلوچ نا پارت آ محکمہ کشت وکشار 19 جولائی اسکان مروک آ پِرتیٹی کشت وکشار نا بشخ ءِ مروک آ نسخان تا پوروی کن صوبائی حکومت آن اسہ سمری اسے نا کمک اٹ 52 ارب روپئی خواہسوسس وخت اس کہ پِر تا مسٹ میکو و چارمیکو اسپیل اٹی ہم بھلو کچ اسے آ کشت وکشار ءِ نسخان رسینگانے۔
