اسلام آباد۔ 01 ستمبر (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ سید علی گیلانی پاکستان نا زبردست مخ تف ئسک و او تینے پاکستان نا بشخ اس سرپند کریکہ، او کشمیری تا است انا توار ئسک ، ایل او سی نا ہڑتوم آ کنڈآتا کشمیریک سید علی گیلانی نا توار آ لبیک پاریرہ۔ پنچ شنبے نادے آ پنی آ کشمیری راہشون سید علی گیلانی نا اولیکو کزیہ دے انا وخت آ اودے زبردست خراج عقیدت پیش کرسا قمر زمان کائرہ پارے کہ سید علی گیلانی کون آ نمان و واکدار کشمیری توار ءِ ننے آن ہنوک اسہ سال اس مسنے، ورنائی آن کزیت اسکان سید علی گیلانی کشمیری تا آجوئی کن پرامن جہد کرے ، او کشمیری تا است انا توار ئسک۔ اوپارے کہ ایل او سی نا ہڑتوم آ کنڈآتا کشمیریک سید علی گیلانی نا توار آ لبیک پاریرہ، سید علی گیلانی و اونا کاہوت تینا پرعزم جہد نا سوب آن بھارتی حکومت نا ظلم و جور انا گواچی ئسر، اودے بھلو وخت اسسکان زندان تیٹی بند کننگا، ولے بھارتی حکومت سید علی گیلانی نا عزم ءِ شکست تننگ اٹ بے سہب مس۔ قمر زمان کائرہ پارے کہ سید علی گیلانی پاکستان نا زبردست مخ تف ئسک و اوتینے پاکستان نا بشخ سرپند کریکہ، بھارتی حکومت اوڑآن ہنداخہ در خارزدہ ئسک کہ اونا کزیت آ مقبوضہ دامان اٹی کرفیو خلنگا، حکومت کشمیری الس و اوفتا رشتہ دارآتے جنازہ و جہہ جاگہ ٹی بشخ ہلنگ نا موکل اسکان تتو۔ اودعاکرے کہ اللہ تعالیٰ سید علی گیلانی ءِ جنت الفردوس اٹ جاگہ ایتے و کشمیری تا تحریک آجوئی ءِ سرسہبی نصیب کے۔
