اسلام آباد۔ 01 ستمبر (اے پی پی) مسلم لیگ (ن) نا راہشون و مسکوہی وزیراعظم شاہد خاقان عباسی پارینے کہ لیڈر اسے نا مقبولیت نا آب گچین کاری مریک ، ولے کس اسے نا مقبولیت ملک انا زرگزران ءِ بھس کننگ نا موکل تفک، مسکوہی وزیر خزانہ شوکت ترین عمران خان و تینا جماعت نا بڑزکو رکڑدہ غاتا زی آ اسہ حساس ءُ وخت اسے ٹی اقتصادی دہشت گردی کرینے، عمران خان نا تدوک آ 4 سال انا بے سہبی تیٹی مروک آ بھسکاری آن پیش تمنگ اٹ کیہی سال لگک، داوخت دوبہ غاتا، پرچہ درج کننگ و تہمت خلنگ نا اف بلکن الس نا ویل آتا ایسر کننگ نا ءِ، نوکاپ نا سوب آتا جاچ ءِ ہلسا اوفتا ہم ایسری اس کشنگ نا گرج ءِ۔ پنچ شنبے نادے آ پریس کانفرنس آن تران کرسا اوپارے کہ نوکاپ آن خیبرپختونخوا، بلوچستان و سندھ اٹی بھسکاری تالان مسنے، حکومت نوکاپ نا زہمی تے ریلیف تننگ کن کوشست کننگ اٹی ءِ ، حکومت زرگزران نا گچینی کن تدوک آ 4 تُو آن ہرا کوشست آتے کریکہ اوفتا اثرداسہ بننگ بناکرینے۔ اوپارے کہ زرگزران نا سوگوی کن کوشست آتیان بھلا کوشست آئی ایم ایف پروگرام نا بحالی ئسک، آئی ایم ایف معاہدہ عمران خان نا حکومت کریسس، ریاست نا وڑاٹ کروک آ معاہدہ غاتیا عمل کننگ ہر حکومت نا زمواری مریک۔ اونا پاننگ ئس کہ شوکت ترین فروری ٹی ہرامعاہدہ غاتے کرے اوفتے پرغنگا، ہراتم اوفتے نظر بس کہ حکومت ہِننگ ءِ تو اوفک پیٹرول نا نہاد آتے ہلنگ آن ہم کم کریر، گیس انا نہاد آتے ودفنگتو، 3 ہزار ارب وام بجلی و 2 ہزار ارب نا وام تا گیس انا بشخ ءِ مون تروک ءِ۔ اوپارے کہ حکمران تپہ نا غفلت نا بھاریم الس آ تمک، ملک ءِ مون تروک مشکل عمران خان نا بے سہبی و ڈیوالئی نا نتیجہ ءِ۔ نن چیلنج آتا مقابلہ ءِ کرین و مشکل فیصلہ کرین، اگہ ننا حکومت ہم ہموفتے کریکہ ہرافتے عمران خان کرسا کرے تو بھاز بھسکاری مسکہ۔ شاہد خاقان عباسی پارے کہ مفتاح اسماعیل و ایلو ٹیم بھاز جانفشانی اٹ کاریم کریر، ہرامشکل فیصلہ غاتے کرینو ہموفتیان ملک انا زرگزران نا گچینی نا کسر پیش تمک۔ اوپارے کہ 29 اگست آ آئی ایم ایف بورڈ انا آخیریکو میٹنگ ئسک، مسکوہی وزیر خزانہ شوکت ترین ہرانا ہر دور حکومت اٹ کڑد مسنے، ہنداخاطرآن دا پاکستان نا زرگزران و آئی ایم ایف پروگرام آن جوانی اٹ بلد ءِ، اودے سما ءِ کہ ہراہیت ءِ کننگے و داہیت آتا انت اثراس تمک۔
