گلگت۔ 01 ستمبر (اے پی پی) وزیراعظم پاکستان نا سلاہکار امور کشمیر و گلگت بلتستان قمر زمان کائرہ پارینے کہ ہر اپیکج نا پڑو ءِ پاکستان اٹی نوکاپ آن زہمی علاقہ غاتا مخلوق کن کننگا ہمو پیکج آ گلگت بلتستان اٹی ہم عمل مریک و زہمی نوکاپ نا بحالی کن سروے غٹ آن مست گلگت بلتستان آن بناکیک۔ گلگت اٹی میڈیا نا نمائندہ غاتون گپ وتران کرسا اوپارے کہ ہراننا ایڑھ و ایلم نوکاپ نا سوب آن دا دنیا غان ہنانو اوفتے کن بنجائی حکومت نا کنڈآن پرائم منسٹر پیکج نا رداٹ 10 لکھ روپئی نا پڑو کننگانے۔ ہنداوڑ ٹھپی تیکن ہم پیکج نا پڑو کننگانے۔ اوپارے کہ ارٹ میکو ریسہ نوکاپ نا زہمی تے ریسکیو کننگ ءِ۔ دا مد اٹی پی ڈی ایم اے ءِ المی گڑاتسونن۔ زہمی تے عارضی جاگہ یا کِرانا ہند آتیٹی شفت کرینن یا کننگک۔ اوپارے کہ مسٹ میکو ریسہ نوکاپ نا زہمی تا بحالی نا ءِ۔دا ریسہ ٹی زہمی علاقہ غاتا سرجم سروے مریک۔ ملک انا ایلو بشخ آتیٹی داوخت آ دیر سلوک ءِ ، ہموڑے داوخت آ سروے ممکن اف، ہنداخاطرآن سروے اول گلگت بلتستان آن بناکیک و اودے زوت پورو کننگک۔ اوپارے کہ گلگت بلتستان نا بجٹ آ مہالو ہم کٹ خلنگ اکن الیتون و آخبت ہم داوڑ مفک۔ اوپارے کہ وزیراعظم پاکستان شہباز شریف گلگت بلتستان اٹی نوکاپ آن زہمی علاقہ غاتا دورہ ءِ کیک و گلگت بلتستان حکومت نا کمک کن فنڈ آتا پڑو کیک۔ اوپارے کہ وزیراعظم پاکستان گلگت بلتستان اٹی نوکاپ آن زہمی علاقہ غاتا دورہ ءِ کیک۔
