کراچی۔ 01 ستمبر(اے پی پی) پاک بحریہ نا مچ آ ملک انا نوکاپ زدہ علاقہ غاتیٹی ریلیف اینڈ ریسکیو آپریشن برجاءِ۔ جاری اعلامیہ نا رداٹ پاک بحریہ نا ورناک سندھ انا چندی علاقہ بشمول سانگھڑ، تحصیل مہر، سلطان کوٹ، شاہ بندر، کوڈاریو، دولت پور، چوھڑ جمالی، سجاول و ٹھٹھہ ٹی کمکی کارروائی تیٹی بشخ ہلنگ اٹی ءُ۔ پاک بحریہ سندھ اتون اوار اوار کمکی کارروائی تا دنگ ءِ پنجاب و خیبرپختونخوا نا نوکاپ زدہ علاقہ غاتسکان ہم ودفینے۔ پاک بحریہ نا ورناک کشتی و ہیلی کیپٹر آتا کمک اٹ نوکاپ زدہ علاقہ غاتیٹی اختہ بندغ آتے رکھ ہند آتیا گدریفنگ ءُ۔ پاک بحریہ نا کنڈآن زہمی تیٹی راشن بیگ، تیار کن و خور، دیر و ایلو زند انا گرج انا گڑا بشخنگ انگ ءِ۔ پاک بحریہ نا کنڈآن راجن پور، سانگھڑ و ڈی آئی خان اٹی میڈیکل کیمپ آتیان بیدس چندی علاقہ غاتیٹی موبائل میڈیکل ٹیم ہم کاریم کننگ ءُ۔ پاک بحریہ نا ورناک ڈیرہ اسماعیل خان اٹی چشمہ روڈ انا عارضی جوڑ جاڑ آن پد اودے لس ٹریفک کن ملانو۔
