ملتان۔ 01 ستمبر (اے پی پی) صدر مملکت ڈاکٹر عارف علوی پارینے کہ سندھ و بلوچستان اٹی ڈیلے ایکشن ڈیم و دیری کوڑی جوڑ کننگ ناگرج ءِ تانکہ نوکاپی دیر تے کوڑی کننگ مرے و گرج انا وخت آ کاریم اٹ اتنگ مرے۔ اوپارے کہ آخبت اٹ فصل آتا انشورنس ءِ مون آ دننگ نا گرج ءِ تانکہ نوکاپ یا ایلو قدرتی آفت آتا سوب آن بزغرآتا نسخان تا پوروی مننگ کے، فصل آتا انشورنس آن نئے بیرہ داوڑنا آفت آتیٹی بزغرآتا نسخان تے پورو کننگ مریک بلکن عام حالیت آتیٹی فصل خراب مننگ نا حالیت اٹ ہم اوفتے ادائیگی مریک۔ اوپارے کہ داوار ڈیرہ غازی خان اٹی کوہ سلیمان نا رودکوہی تیٹی بھلو دیر اس بس ہراانسان، ساہدار، ماڑی و انفراسٹرکچر ءِ بھاز زیات نسخان تس۔ نوکاپ آن مچ آ ملک اٹی بھسکاری مس و غٹ صوبہ غاک دا حالیت آتیان اسہ وڑ زہمی مسنو۔ داخیال آتا درشانی ءِ او پنچ شنبے نادے سہب اتون ڈیرہ غازی خان اٹی فلڈ ریلیف کیمپ انا دورہ ءِ کننگ نا وخت آ زہمی تیان تران کرسا کرے۔ صدر مملکت ڈاکٹر عارف علوی نوکاپ آن زہمی بندغ آتا طب انا اَریفے و پارے کہ انتظامیہ نما خیال ءِ تخنگ ءِ و حکومت ءِ نمے آن لاتعلق اف و اودے نما مشکل آتا پورو درک ءِ۔ داوخت آ زہمیک صدر مملکت ءِ تینا ویل آتیان معلومدار کریر۔ صدر مملکت ڈاکٹر عارف علوی پارے کہ قدرتی آفت آتون مون تننگ کن بوائے اسکاؤٹس و گرلز گائیڈز تنظیم تے فعال کننگ نا گرج ءِ تانکہ آخبت اٹ حکومت، فوج و الس نا کمک اٹ داوڑنا آفت آتا مقابلہ ءِ کننگ مرے۔ صدر عارف علوی نوکاپ زہمی تے پارے کہ اولیکو ریسہ ٹی ننکن انسانی جان تا بچفنگ زیات اہم ئسک سو انتظامیہ پبی وڑاٹ زہمی علاقہ غاتیان مخلوق ءِ ریسکیو کننگ نا کاریم کرے۔ اوکان پد داسہ نن بحالی نا عمل نا بناءِ کننگ اُن۔ صدر ڈاکٹر عارف علوی انتظامیہ ءِ پارت کرے کہ نوکاپ زدہ علاقہ غاتیٹی گمانی دینی مرض آتیان بچنگ کن پیشگی بست وبند کننگے۔ اومحکمہ موسمیات نا نظام ءِ پین گچین کننگ نا گرج آ ہم زور شاغا تانکہ داوڑنا آفت آتا پیشگی حوال ملنگ آن انتظامیہ گچین وڑاٹ تیار مرے۔ داکان مست صدر مملکت ڈاکٹر عارف علوی ڈیرہ غازی خان آ سرمس تو کمشنر ڈیرہ غازی خان اودے نوکاپ آن مروک آ بھسکاری تیان معلومدار کرے و نسخان تا سرجمی اٹ پارے۔ کمشنر پارے کہ ڈویژن اٹی ہفت رودکوہی ءُ ہرافتے ٹی عام وڑاٹ پِر تا دیر بریک ولے دا وار چاررودکوہی تیٹی ہروارآن بھاز زیات دیر بس ہرانا سوب آن 2010 ء نا نوکاپ آن ہم زیات نسخان مس۔ اوپارے کہ داتم اسکان اسہ لکھ دہ ہزار ایکڑ رقبہ ءِ دیر ہرفینے، 48 مرک مسنے۔ دافتیان 20 مرک نوکاپ نا دیر دننگ آن مس وخت اس کہ 28 مرک چندی اُراتا تمنگ آن مس۔ حکومت پنجاب زوال کروک آتا خاہوت آتے 8 لکھ روپئی فی کس تننگ ءِ و کابینہ نا بروک آ دیوان اٹی دا امداد اٹی پین ودکی کننگ نا منظوری ءِ ہلنگک۔ کمشنر ڈی جی خان پارے کہ نوکاپ نا سوب آن 90 مخلوق بھاز ٹھپی و 800 زرس ٹھپی ءُ وخت اس کہ 383 بھلو و 1136 چنکو ساہدار کسکنو، 11 ہزار 409 اُرا پورو بھس وخت اس کہ 13 ہزار 275 اُراتے جزوی نسخان رسینگانے۔ کمشنر صدر پاکستان ءِ حوال ترسا مستی پارے کہ داتم اسکان ریسکیو نا 92 بوٹ و 1183 ریسکیو کارندہ غاک 20 ہزار بندغ ءِ حفاظت اٹ ریسکیو کریر۔ اوپارے کہ نوکاپ آن 1055 کلومیٹر سڑک ، 116 اسکول آتا ماڑی، 33 ہسپتال و 2 کالج زہمی مسنو۔ کمشنر پارے کہ نوکاپ زدگان تا کمک کن 42 ریلیف کیمپ، 69 میڈیکل کیمپ، 70 ویٹرنری کیمپ و ٹینٹ ویلج ہم جوڑ کننگانے۔ نوکاپ زدگان تے رہینگ انگ کن 12 ہزار 604 ٹینٹ تننگانے وخت اس کہ 4 ہزار 240 نت انا بیگ ، 38 ہزار 484 راشن بیگ و 2 ہزار 353 دیگ بسنگانے۔
