ڈیرہ غازی خان۔ 01 ستمبر (اے پی پی) صدر مملکت ڈاکٹر عارف علوی نوکاپ نا بابت وارننگ سسٹم ءِ پین گچین کننگ نا گرج آ زور شاغسا پراینے کہ نوکاپ نا مون ءِ توننگ و دیر کوڑی کننگ نا لائخی ٹی ودکی کن بھلا ڈیم تا تفنگ المیءِ۔ ایوان صدر نا پریس ونگ انا کنڈآن جاری بیان نا رداٹ صدر مملکت داخیال آتا درشانی ءِ پنچ شنبےنادے آ نوکاپ آن زہمی علاقہ نا دورہ ءِ کننگ نا وخت آ ڈیرہ غازی خان ضلعی انتظامیہ نا کنڈآن تروک آ حوال اٹی کرے۔ صدر ڈیرہ غازی خان اٹی 3 لکھ ایکڑآن زیات رقبہ غا سلوک فصل، نہادی جانی و مالی نسخان و ہزار آ ماڑی تے ملوک آ نسخان آ گڑتی نا درشانی ءِ کرے۔ صدر مملکت پارے کہ مخلوق نا جان و مال ، ساہدار، اُرا و فصل آتے مروک آ نسخان نا ازالہ ءِ کننگ حکومت نا اولیت مرے۔ اونوکاپ نا بابت وارننگ سسٹم ءِ پین گچین کننگ نا گرج آ زور شاغا۔ صدر ڈاکٹر عارف علوی پارے کہ ڈیرہ غازی خان اٹی مشی آ نوکاپ نا دیر تے کوڑی کننگ کن ڈیلے ایکشن ڈیم تا تفنگ آ چکار کننگے۔ اوپارے کہ نوکاپ نا مون ءِ توننگ و دیر کوڑی کننگ نا لائخی ٹی ودکی کن بھلا ڈیم تا تفنگ المی ءِ۔ صدر مملکت پارے کہ حکومت نا کنڈآن نوکاپ زہمی تا نسخان تا زوت پوروی ءِ کننگ نا گرج ءِ، فصل آتا انشورنس کرفنگ آن آفت آتا سوب آن بزغر و کشارگر آتا نسخان تے پورو کننگ مریک۔ صدر ڈاکٹر عارف علوی کشارگر و بزغر آتے فصل آتا انشورنس کرفنگ نا ترغیب تننگے، نوکاپ آن پد ناجوڑی تا تالانی ءِ توننگ و جان جوڑی نا گرج آتے پورو کننگ آ خاص چکار کننگے۔
