اسلام آباد۔ 01 ستمبر(اے پی پی) وزیراعظم شہباز شریف پارینے کہ سید علی گیلانی نا ’’ نن پاکستانی اُن، پاکستان ننا ءِ‘‘ نا نعرہ نا توار مچ آ دنیا ٹی پِننگ ءِ، پاکستانی و کشمیری الس سید علی گیلانی نا جہد ءِ سلام پیش کیرہ۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم آجوئی ءِ کشمیر نا نشانی سید علی گیلانی ءِ اول یوم شہادت آ خراج عقیدت پیش کرسا پارے کہ کشمیری تا سید علی گیلانی کن بابائے حریت نا پِن ءِ تننگ اونا تاریخی جہد نا امنائی ءِ۔ مرد آہن سید علی گیلانی نا جہد حریت و کشمیرنا آجوئی نا تاریخ نا روشناءُ بشخ اسے۔ اوپارے کہ سید علی گیلانی اسہ بندغ اس آخا تحریک و مشن نا پن ءِ ہرانا نعرہ کشمیر مریک پاکستان ءِ۔ سید علی گیلانی شہید نا میت ءِ پُلنگ آن کشمیری تا آجوئی کن تڑپ ءِ پُلنگ مفک۔ وزیراعظم پارے کہ پاکستانی و کشمیریک سید علی گیلانی ءِ سلام پیش کیرہ۔ ’نن پاکستانی اُن، پاکستان ننا ءِ‘ نا اونا نعرہ نا توار اینو مچ آ دنیا ٹی پِننگ ءِ۔ اودعا کرے کہ اللہ تعالیٰ سید علی گیلانی تون اوار غٹ کشمیر نا شہید آتا درجہ غاتے بڑز و اوفتا غٹ پدسلوک آتے صبر و جمیل عطاکے۔
