متحدہ عرب امارات نا سفیر نا پاکستان اٹی نوکاپی حالیت آتیا است ہسونی نا درشان، کمکی سرجزآتے برجا تخنگ نا عزم انا درشانی

اسلام آباد۔ 31 اگست (اے پی پی) پاکستان اٹی متحدہ عرب امارات نا سفیر حمد عبید الزعابی پاکستان نا حکومت و برادر الس تون مچ آملک اٹی مروک آ ساڑی آ تباہ کن نوکاپ نا زہمی تیکن ہڑزخواہی نا درشانی ءِ کرینے۔ متحدہ عرب امارات نا سفارت خانہ غان چارشنبے نادے آ جاری بیان نا رداٹ سفیر زہمی تا خاہوت آتون تینا ہمدردی نا درشانی ءِ کرسا ٹھپی تا زوت دراخ جوڑی کن دعا کرے۔ سفیر پارے کہ متحدہ عرب امارات نا صدر شیخ محمد بن زید آل نہیان نا پارت آتیا عملدرآمد کرسا پاکستان کن انسانی امداد نا اسہ فضائی پول اس جوڑ کننگانے ہرا پاکستان اٹی طوفانی پِر و نوکاپ آن زہمی بندغ آتیکن کمکی گڑا، پناہ گاہ تا گڑا و انسانی گرج آتا فراوانی ءِ کیک، داامداد اٹی خور، دوائی  تمبو و ایلو المی آ گڑاک اوار ءُ، ہرانا مسخت زہمی آبادی نا تکلیف آتے کم کنننگ و اوفتا کمک ءِ کننگ ءِ۔ بیان نا رداٹ اولیکو اماراتی کمکی جہاز یک شنبے نادے آ اسلام آباد آ سرمس ہراٹی خور دوائی و پناہ گاہ تیکن تمبو و چندی کمکی گڑاک ئسر، داکان پد چندی و ایلو کمکی جہاز آ ک پاکستان اٹی ساڑی آ نوکاپ و طوفانی پِر تیٹی مروک آ نسخان تے کم کننگ کن کمک فراوان کیرہ۔ بیان نا رداٹ دا کمکی پروگرام ہڑتوم آ برادر ملک آتا نیام اٹ تعلقداری تا گہرائی و سوگوی نا ڈیک ءِ ایتک و دا کہ متحدہ عرب اماراتر تدوک آ دہائی تیٹی بھاز انگا انسانی تنکی تیٹی خاص وڑاٹ قدرتی آفت آتیٹی پاکستان و پاکستانی الس نا کمک ءِ کرینے۔ یواے ای نا سرکڑدہ غاتا پارت آ سندھ، بلوچستان، پنجاب و خیبرپختونخوا ٹی زہمی علاقہ غاتیکن انسانی امداد مخلوق ءِ کمک فراوان کننگ و اوفتا زند ءِ آسان جوڑ کننگ نا اولیت آ مبنی ءِ و ضرورت مند مخلوق کن انسانی شونداری ٹی متحدہ عرب امارات نا سرکڑدہ غاتا اصل آتا رداٹ ءِ۔ بیان اٹی پاننگانے کہ ننا آسودہی تنظیمک دُن کہ یو اے ای ریڈ کریسنٹ ، خلیفہ زید آل نہیان فاؤنڈیشن و ایلو خیراتی ادارہ غاک پاکستانی تعلقدار کمامدارآتون اواری اٹ پِر و نوکاپ زہمی تیکن ریسکیو و ریلیف فراوان کننگ کن کاریم کننگ اٹی ءُ، و سندھ ، بلوچستان، سویلی پنجاب و خیبرپختونخواٹی زہمی مخلوق اٹی کمکی طبی گڑا و تمبو سرسہبی اٹ بشخنگ ءُ۔ صوبہ سندھ انا نوکاپ زدہ علاقہ غاتیٹی اسہ موبائل کلینک اس ہم مخلوق نا درمان ءِ کننگ ءِ۔