پاکستان و قطر ڈیہہ نا شونداری و شونہالی نا اسیجائی ویژن تخرہ، چیئرمین سینیٹ محمد صادق سنجرانی تون قطر انا سفیر نا اوڑدہی

اسلام آباد۔ 31 اگست (اے پی پی) چیئرمین سینیٹ محمد صادق سنجرانی پارینے کہ پاکستان و قطر ڈیہہ نا شونداری و شونہالی نا اسیجائی ویژن تخرہ، واپاری ، سفارتی و ادارہ جاتی کمکاری ءِ پین مون آ دننگ نا خواہندار ءُ۔ سینیٹ سیکرٹریٹ نا رداٹ داخیال آتا درشانی ءِ او قطر انا سفیر شیخ سعود عبدالرحمان الثانی تون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ اوڑدہی ٹی بڑزکو کہول انا ڈل آتا ہن و بر اٹی ترندی اتنگ و زرگزرانی رابطہ غاتے پوسکن آ بڑزی تیا دننگ آ ہم گپ وتران کننگا۔ چیئرمین سینیٹ پارے کہ پاکستان و قطر ڈیہہ نا شونداری و شونہالی نا اسیجائی ویژن تخرہ۔ واپاری، سفارتی  و ادارہ جاتی کمکاری ءِ پین مون آ دننگ نا خواہندار ءُ۔ اقتصادی و زرگزرانی شونداری کن اواری اٹ کوشست کروئی مریک۔ اوپارے کہ قطر اٹی رہینگوک آ پاکستانیک ہڑتوم آ ملک آتا نیام اٹ رابطہ کاری ٹی اہم کڑد ادا کننگ ءُ۔ ننا است خواہی ءِ کہ واپاری، دودوربیدگی و کثیر الجہتی کمکاری ءِ پین سوگو کننگے۔ چیئرمین سینیٹ پارے کہ کمکی کاریم تیٹی پین ترندی اتنگ نا گرج ءِ، جہانی برادری و خاص وڑاٹ قطر انا منت وار اُن۔ بلوچستان و ایلو صوبہ غاتیٹی بھلو کچ اسے آ بھسکاری مس۔ غٹ ادارہ غاک مشکل آتیان پد ہم ریلیف نا کاریم تیٹی دے و نن ءِ اسٹ کرینو۔ قدرتی آفت آتا مقابلہ ءِ کننگ کن غٹ ملک آتے اسہ جاگہ غا کاریم کننگ نا گرج ءِ۔ قطر انا امیر قطر انا جم زرگزرانی شونداری و شونہالی ٹی اہم کڑد ادا کرینے۔ امیر قطر انا کوشست ستاکڑزک۔ چیئرمین سینیٹ پارلیمانی ، واپاری و راجی  رابطہ کاری ءِ پین سوگوی تننگ نا خاطر ڈل آتا ہن و بر آ ہم زور شاغا۔ سفیر پاکستان اٹی ساڑی آ پِر و نوکاپ آن مروک آ جانی و مالی نسخان تیا است ہسونی نا درشانی ءِ کرے۔ اوپارے کہ قطر پاکستان تون پورو یکجہتی نا درشانی ءِ کیک۔