پتن۔ 31 اگست (اے پی پی) وزیراعظم محمد شہباز شریف پارینے کہ نوکاپ و پِر تیان زہمی آخیریکو اُرا و بندغ نا آبادکاری اسکان آسرات تولپنہ، مچ آ دنیا غان زہمی تا کمک آ اوفتا منت وار اُن، اللہ تون قول ءِ کہ نن غٹ اواری اٹ پک کینہ کہ اسہ حقدار اس ہم امداد نا محروم مف، امداد نا شفاف بشخنگ و فراوانی ءِ پک کینہ، بنجائی حکومت زوال کروک آ بندغ آتا خاہوت آتے دہ لکھ روپئی ایتک، مصیبت نا داساہت اٹی غٹ زہمی تتون سلوک اُن۔ چارشنبے نادے آ وزیراعظم شہباز شریف نوکاپ و پِر تیان زہمی لوئر کوہستان نا دورہ ءِ کرے ہراڑے او نوکاپ آن زہمی بندغ آتون اوڑدہی ہم کرے۔ کمشنر ہزارہ ڈویژن و ڈپٹی کمشنر وزیراعظم ءِ کمکی کارروائی تا بابت حوال تسر۔ اوفک پاریر کہ دا علاقہ ٹی 18 مرک مسنے، زہمی تیکن ہنکینی و میڈیکل کیمپ جوڑ کننگانے۔ وزیراعظم داوخت آ زہمی تیان تران کرسا پارے کہ نن داڑے نوکاپ اٹ زوال کروک آتا خاہوت آتون ہمدردی نا درشانی ءِ کننگ کن ساڑی مسونن، کالام، سوات، بحرین، کوہستان اٹی دریاٹی طغیانی آن بھاز زیات نسخان مسنے ، داڑے اختہ سیل و سواتی تے سلہہ بند فوج انا ہیلی کیپٹر آک رکھ ہند آتیا سرکننگ ءُ، بنجائی حکومت مصیبت نا داساہت اٹی زہمی تتون سلوک ءِ ہراتم اسکان اوفتے تینا اُراتیٹی بحال کپنہ آسرات تولپنہ، صوبائی حکومت آک، این ڈی ایم اے و پی ڈی ایم اے و انتظامیہ زہمی تا خذمت کن ساڑی ءُ، نوکاپ و پِر تیان ہرااُراءِ ہم نسخان رسینگانے اودے 25 ہزار روپئی فی کس تننگ اُن وخت اس کہ زوال کروک آ بندغ آتا خاہوت آتے دہ لکھ روپئی بنجانا کنڈآن تننگ انگ ءِ۔ وزیراعظم پارے کہ سندھ اٹی نوکاپ آن غٹ آن زیات نسخان مسنے داکان بیدس بلوچستان، سویلی پنجاب، کے پی کے ، گلگت بلتستان، آزاد کشمیر تون اوار ہراڑے کہ نوکاپ آن نسخان مسنے اخس وسیلہ ہم مسنے اوفتے اوفتیا خلینہ، سنگت ملک آتا کنڈآن امداد ملنگ ءِ، اوفتا منت واراُن، سعودی عرب، متحدہ عرب امارات ، قطر، ایران، چین ، ترکی تون اوار ایلو برادر ملک ننا کمک ءِ کننگ ءُ۔ امریکہ، برطانیہ ہم امداد نا پڑو کرینو، اقوام متحدہ 160 ملین ڈالرنا فلیش اپیل کرینے۔ اوپارے کہ ہراکان ہم ننے امداد ملک، اللہ تعالیٰ تون قول ءِ کہ غٹ اواری اٹ اوفتے حقدار آتسکان سرکینہ ۔ اوپارے کہ خیبرپختونخوا کن 10ارب روپئی نا پڑو کرینے ہرا این ڈی ایم اے صوبائی انتظامیہ تون اواری اٹ شفاف وڑاٹ بشخک۔ وزیراعظم دا عزم انا درشانی ءِ کرے کہ آخیریکو اُرا و بندغ نا آبادکاری اسکان آسرات تولپنہ۔ داوخت آ وزیراعظم نا سلاہکار انجینئر امیر مقام، ڈپٹی اسپیکر قومی اسمبلی زاہد اکرم درانی، پیپلزپارٹی نا راہشون نجم الدین خان ئسک ہم وزیراعظم تون اوار ئسر۔
