کالام ۔ 31 اگست (اے پی پی) وزیراعظم شہباز شریف خیبرپختونخوا ٹی نوکاپ آن زہمی بندغ آتیکن 25 ہزار روپئی فی بندغ نا فراوانی نا مد اٹی بنجانا کنڈآن 10 ارب روپئی نا پڑو کرسا پارینے کہ سیوتی حکومت آخیریکو زہمی بندغ نا بحالی اسکان تینا کوشست آتے برجاتخک، آئی ایم ایف پروگرام نا بحالی آن ملک ڈیفالٹ مننگ نا خطرہ غان پیش تما، اللہ کے کہ پاکستان کن آئی ایم ایف نا دا آخیریکو پروگرام مرے، نن پاکستان ءِ دنیا ٹی اونا گوہوک آ ہند ءِ پدی ترفنگ کن کوشست کننگ اُن، اللہ تعالیٰ پاکستان ءِ انسانی و قدرتی وسیلہ تسنے، داعلاقہ غاتیٹی اختہ غٹ سیل و سواتی تے پنچ اسکان اسکان کشنہ۔ چارشنبے نادے آ وزیراعظم شہباز شریف خیبرپختونخوا ٹی نوکاپ آن زہمی علاقہ کالام و سوات نا دورہ ءِ کرے۔ وزیراعظم نوکاپ زہمی تتون گپ وتران ہم کرے۔ داوخت آ انجینئر امیر مقام، ڈپٹی اسپیکر زاہد اکرم درانی، نجم الدین و ایلوفک ہم ساڑی ئسر۔ میڈیا تون گپ وتران کرسا وزیراعظم پارے کہ اینو ای خیبرپختونخوا نا دورہ غا بسونٹ مخلوق تون ملانٹ۔ اوفتے تون گپ وتران کریٹ۔ داڑے سینٹر اٹی زالبول، چنا تتون اوار بھلو سیل و سواتی اس ہم ساڑی ءِ اوفتے اوفتا اُرااسکان سرکینہ، پاکستان نا فوج انا ہیلی کیپٹر آک اوفتے کشنگ ءُ۔ داڑے اختہ سیل و سواتی تے کشنہ، مدین، بحرین کالام اٹی دریاٹی دیر انا ودنگ آن بھسکاری مس، ہچ ءُ شک اس اف کہ دا قدرتی آفت ضرور ئسک ولے ہیبدار انسانی ڈٹ بندی نا سوب آن دا نسخان ’’مین میڈ‘‘ ءِ۔ ہوٹل دریاتیٹی و دیر اٹی غلط وڑاٹ تفنگا۔ چنکو وخت اسے ٹی دافک تمار، اُراتے نسخان رسینگا، پول و سڑک آک زہمی مسر۔ اوپارے کہ حکومت پاکستان صوبائی حکومت، سلہہ بند فوج پاکستان، این ڈی ایم اے ، گچین مروک نمائندہ ، انتظامیہ و پی ڈی ایم اے تون اواری اٹ دے و نن کمک کننگ ءِ۔ داکان سیل وسواتی تا کشنگ نا عمل دے و نن برجا ءِ داڑآ آرمی چیف و ایئر چیف نا منت وار اُن ۔ پاننگاکہ پنچ شنبے اسکان داڑے اختہ غٹ سیل و سواتی تے کشنگک۔ اوپارے کہ داڑے ہرا بھسکاری مسنے ، دادریانا پُر مننگ نا سوب آن بس۔ اوپارے کہ تدوک آ دے چیف آف آرمی اسٹافک ہم داجاگہ نا دورہ ءِ کرے۔ سندھ بلوچستان اٹی پِرتیان بھسکاری مس اسہ ہزار آن زیات مخلوق زوال کرے۔ غٹ میدانی علاقہ غاک سمندر نا منظر ءِ پیش کننگ ءُ، ہزار آ مخلوق ٹھپی ، لکھ آ بے اُرا مسنو۔ انفراسٹرکچر ءِ نسخان رسینگا۔ 7 لکھ ساہدار تے دیر درینے۔ لکھ آ ایکڑ ڈغار تیا فصل آتے نسخان رسینگانے۔ اِلار نا درخت، برنج کرپاس نا فصل بھس مس۔ اوپارے کہ لکھ آ مخلوق بے چھت آن پناہ ہلکونو۔ مچ آ قوم انا کوشست آتے اٹ اوفتے رکھ ہند آتیا سرکننگانے۔ ای صوبائی حکومت، پاک فوج و این ڈی ایم و پی ڈی ایم ءِ شاباش ایتیوہ ہرا زہمی تا بحالی کن دے و نن کوشست کننگ ءُ۔ اوپارے کہ سڑک و پول آک پنانو، بجلی نا نظام درہم برہم مسنے۔ وزیر توانائی سندھ و سیکرٹری بلوچستان اٹی ءِ۔ ایف ڈبلیو او و این ایچ اے پبی وڑاٹ فعال ءُ۔ اوپارے کہ بنجائی حکومت 28 ارب روپئی این ڈی ایم اے و بی آئی ایس پی نا کمک اٹ تننگ ءِ۔ سندھ و بلوچستان اٹی 25 ہزار روپئی فی خاہوت نا حساب اٹ بشخنگ برجاءِ۔ سندھ 15 ارب و بلوچستان کن 10 ارب روپئی فراوان کرینے، نسخان داکان ہم زیات ءُ، پین زر فراوان کینہ۔ ایلو صوبہ غاتیٹی ہم زر انا فراوانی نا بناءِ کننگ اُن۔ زوال کروک آتا خاہوت آتے 10 لکھ روپئی فی کس و ٹھپی مروک آتے مسہ لکھ روپئی تننگ اُن، دا زر آن جتا مروک آتیان اوفتا نسخان نا پوروی تو مفک ولے حکومت نا دا فرض ءِ و نن دا فرض ءِ پورو کننگ اُن۔ فصل آتا نسخان نا جاچ ءِ ہلنگ اُن۔ او پارے کہ مسہ نیم ہزار کلومیٹر آن زیات سڑک آک بھس مسنو۔ اوخیبرپختونخواکن 10 ارب روپئی فراوان کننگ نا پڑو کرے تانکہ این ڈی ایم اے تون اواری اٹ دا زر ءِ زہمی تیٹی بشخنگے۔ ننا سیوتی حکومت ءِ، ننا غٹ انا اسیجائی زمواری ءِ کہ الس ءِ دا مشکل آن کشنگ کن ہرممکن کوشست کین، اونا چاروکی ءِ تینٹ کیوہ ، دا اسہ سخت ءُ مرحلہ سے۔ ننا سنگت برادر ملک ہم کمک فراوان کننگ ءُ، مملکت نا سروک آک یکجہتی نا درشانی ءِ کننگ ءُ و اوہروڑنا کمک نا باوری کرفینو۔ ترکی، متحدہ عرب امارات آنکمکی گڑاتے گدریفنگ انگ ءِ۔ ترکی آن کمکی گڑاتے ہرفسا ریل بننگ ءِ۔ کمکی گڑاتا این ڈی ایم اے و پی ڈی ایم اے نا کمک اٹ بشخنگ انگ ءِ۔ اوپارے کہ متحدہ عرب امارات آن 50 ملین ڈالر مالیت نا گڑاتا اولیکو کھیپ انا وڑاٹ تننگ انگ ءِ۔ امریکہ 30 ملین ڈالر امداد نا پڑو کرینے۔ این ڈی ایم اے ، پی ڈی ایم اے تون اواری اٹ دا امداد ءِ بشخنگ انگ ءِ۔ زہمی تیکن ملوک آ امداد ءِ امین مرسا زہمی تسکان سرکینہ۔ داکان مست وزیراعظم شہبازشریف خیبرپختونخوا ٹی نوکاپ آن زہمی علاقہ کالام و سوات نا دورہ ءِ کرے۔ وزیراعظم نوکاپ زہمی تتون گپ وتران ہم کرے۔ وزیراعظم دا وخت آ پارے کہ داڑے اختہ غٹ سیل و سواتی تے کشنہ و داعمل نا چاروکی ءِ تینٹ کیوہ۔ کمکی کاریم تا چاروکی ءِ ہم تینٹ کیوہ۔ کانجو ٹی پاک فوج و این ڈی ایم اے نا کنڈآن وزیراعظم ءِ پاننگاکہ اپر سوات کالام اٹی فتح پور آن بحرین اسکان 18 کلومیٹر سڑک ءِ نسخان رسینگا ، 59 ہوٹل بھس مسنو وخت اس کہ 20 آن 25 ہوٹل جزوی زہمی مسنو۔ کمراٹ آن 500 آن 700 سیل و سواتی وخت اس کہ کالام آن 1400 آن 1500 سیل و سواتی تے کشنگا۔ مٹلٹان اٹی ہائیڈرو پاور پروجیکٹ آ کاریم کروک آ 150 مزور آتے کشنگا۔ زہمی تے خور فراوان کننگا۔ دا علاقہ ٹی 22 بندغ زوال 15 ٹھپی مسنو۔ دہ پول بھس مسنو، 165 اُرا پورو بھس و 230 ءِ جزوی بھس مسنو۔ مٹہ ، بحرین و شانگلہ ٹی 15 شاہراہ زہمی مسنو۔ وزیراعظم ءِ پاننگاکہ کانجو ٹی نوکاپ آن 22 بندغ زوال کرینو ، کالام اٹی 165 اُرا بھس مسنو۔ وزیراعظم جرمنی آن بروک آ سیل و سواتی خاہوت آتون ہم ملا۔ اودے پاننگاکہ داڑے 600 آن 700 اسکان سیل و سواتی داسکان ساڑی ءُ ہرافتے پگہ اسکان کشنگک۔ وزیراعظم سیل و سواتی تتون اوڑدہی ہم کرے۔ اوفتے تروک آ آسراتی تا جاچ ءِ ہم ہلک۔ اودے پاننگاکہ بھلو مشینری اسے ٹی بحالی نا کاریم برجاءِ۔ ننا اولیکو اولیت سڑک آتا بحالی ءِ۔ وزیراعظم ءِ پاننگاکہ مدین، بحرین ، سیدوشریف و کالام اٹی کیہی پول وسڑک آک بھس مسنو۔ وزیراعظم این ایچ اے ءِ پارت کرے کہ شاہراہ تے زوت بحال کننگے۔ کالام اٹی اختہ سیل و سواتی تے دمدستی کشنگے۔ وزیراعظم ہلہلہ ئی بنداو تیا سڑک آتا بحالی نا کاریم ءِ ایف ڈبلیو او نا دوٹی تس۔ ہموڑے اختہ سیل و سواتی تے کشنگ کن دمدستی ہیلی کیپٹر فراوان کرفے۔
