کوئٹہ۔ 30 اگست (اے پی پی) کوئٹہ الیکٹرک سپلائی کمپنی (کیسکو ) پارینے کہ بلوچستان اٹی نوکاپی دیرک 27 گریڈ اسٹیشن تے زہمی کرینو ہراڑآن بجلی نا 700 میگاواٹ شارٹ فال ودی مسنے، کوئٹہ تون اوار ایلو ضلع غاتیٹی گیگ بدل ذریعہ اٹ بجلی نا فراوانی برجاءِ۔ کیسکو ترجمان نا رداٹ ساڑی آ پِر تیان پد نوکاپی حالیت آتیٹی کیسکو نا 220 کے وی و 132 کے وی ٹرانسمیشن لین تا ٹاور تمنگ نا سوب آن سسٹم آ بھاریم ودانے ، ٹاور آتا تمنگ آن کیسکو ءِ کم و ود 700 میگاواٹ بجلی نا کاختی مون تروک ءِ وخت اس کہ داوخت آ کیسکو نا سسٹم اٹی کم و ود 250 میگاواٹ اسکان بجلی دوئی ءِ۔ بی بی نانی پول انا خڑک این ٹی ڈی سی نا 220 کے وی نا 10 و پیر غیب انا علاقہ ٹی کیسکو نا 132 کے وی نا 3 ٹاور تمانو۔ اوپارے کہ دا وخت آ کوئٹہ ءِ گیگ بدل ذریعہ اٹ بجلی فراوان کننگ انگ ءِ۔ جم وڑاٹ صوبہ نا 27 گریڈ اسٹیشن تے بجلی نا فراوانی داسکان بند ءِ ہرافتے ٹی خضدار، وڈھ، باغبانہ، قلات، نال ، زہری، بسیمہ، گدر، منگچر، کھڈ کوچہ و سوراب گریڈ اسٹیشن تتون منسلک علاقہ غاک اوار ءُ۔ دافتیان بیدس مستونگ ، نوشکی، چاغی ، خاران و دالبندین نا علاقہ غاتے ہم بجلی نا فراوانی بند ءِ۔ لورالائی ، ژوب، قلعہ سیف اللہ، پشین، چمن نا علاقہ غاتے ہم ضرورت نا رداٹ سٹی و خلقی فیڈر آتے ہڑدے ئی 2 گھنٹہ بجلی فراوان کننگ انگ ءِ ، بولان اٹی ڈغاری کسر و مواصلاتی نظام نا کشکنگ آن سٹاف ءِ پٹرولینگ و بجلی نا بحالی نا کاریم تیٹی مشکل آتون مون تروئی تمنگ ءِ و حالیت آتا معمول آ بننگ اٹی کم از کم 1 ہفتہ اس لگنگ کیک۔
