راولپنڈی۔ 30اگست (اے پی پی) پاک فوج انا سروک جنرل قمر جاوید باجوہ نوکاپ آن بچفنگ و کمکی کوشست آتا جاچ ءِ ہلنگ کن سوات نا علاقہ غاتا دورہ ءِ کننگ ءِ، اونا دورہ نا مسخت کمراٹ و کالام و کیبی ٹی اختہ مروک آ مخلوق نا کشنگ و کمکی کارروائی تا بارواٹ ڈغاری راستکی تے معلوم کننگ ءِ۔ آئی ایس پی آر نا رداٹ ریسکیو و ریلیف آپریشن کن ملک انا نوکاپ آن زہمی علاقہ غاتیٹی ہیلی کیپٹر آک 82 وار بال کریر، تدوک آ 24 گھنٹہ ٹی 27 ہیلی کیپٹر آتا پرواز آتا کمک اٹ 316 اختہ مروک آ بندغ آتے کشنگا و 23.27 ٹن راشن و کمکی گڑا فراوان کننگا۔ داکان بیدس تدوک آ 24 گھنٹہ ٹی نوکاپ زہمی تیٹی 3540 راشن نا پیکٹ و 250 تمبو بشخنگا وخت اس کہ 51 فری میڈیکل کیمپ آتیٹی 33025 ناجوڑ آتا درمان کننگا۔ آرمی فلڈ ریلیف کوآرڈنیشن سینٹر ہیڈکوارٹر آرمی ایئر ڈیفنس کمانڈ نا رداٹ کاریم کیک ہراٹی فوج انا کہول آ سٹیک ہولڈر آتون ہم گرنچی اٹ ریسکیو و ریلیف نا مربوط کوشست کننگک۔ ریلیف آئٹم تا یکجا کننگ نا 217 پوائنٹ جوڑ کننگانے۔ ہراڑے داتم اسکان 122.87 ٹن خور(نُت، دال، بورہ پین پین) 5.9 ٹن غذائی گڑا(تمبو، لحاف) ، پچ پین پین یکجا کننگانے۔ جہانی نوکاپ ریلیف امداد نا بابت ترکی آن 7 فوجی جہاز کمکی گڑا اتسا کراچی آ سرمسنو۔ متحدہ عرب امارات آن 3 فوجی جہاز نور خان ایئر بیس راولپنڈی آ سرمسنو۔ چین آن 2 جہاز 3000 تمبو اتسا اینو کراچی آ سرمریرہ۔ جاپان آن ترپال و پناہ گاہ اینو کراچی آ سرمریک۔ کینیڈا 5 ملین امریکی ڈالر نا کمک نا پڑو، برطانیہ 1.5 ملین پاؤنڈ تننگ نا قول، آذربائیجان 2 ملین امریکی ڈالر نا پڑو کرینے۔ دا جہاز آتا کمک اٹ اتوک آ کمکی گڑاتیٹی تمبو، دوائی و کن و خور نا گڑااوار ءِ۔
