اسلام آباد۔ 30 اگست (اے پی پی) پاک فضائیہ بلوچستان، سندھ و سویلی پنجاب نا نوکاپ آن زہمی علاقہ غاتیٹی برجا ریلیف و بحالی نا آپریشن تیان بیدس صوبہ خیبرپختونخوا ٹی ہم ریسکیو آپریشن تے ودفینے۔ ترجمان پاک فضائیہ نا رداٹ خیبرپختونخوا نا خلق خیشکی و نوشہرہ کلاں آن 800 بندغ ءِ ریسکیو کرسا رکھ ہند آتیا گدریفنگا۔ داکان بیدس رسالپور نا فیلڈ کیمپ آتیٹی 1400 بندغ ءِ تخنگانے ہراڑے اوفتے مفت طبی درمان، کن و خور و جاگہ فراوان کننگ انگ ءِ۔ وادی نلتر اٹی پاک فضائیہ نا کنڈآن مفت راشن و طبی کمکی کیمپ ہم جوڑ کننگانے۔ ایئر مارشل حامد راشد رندھاوا ڈپٹی چیف آف ایئر اسٹاف (ایڈمنسٹریشن ) و ایئر وائس مارشل معید خان ڈائریکٹر جنرل ایئر آپریشن نوکاپ آن زہمی علاقہ غاتا فضائی جاچ ءِ ہلکر۔ ہڑتوم آ آفیسر آک پی اے ایف نا کارندہ غاتا کنڈآن نوکاپ آن بچفنگ و بحالی نا سرجز آتا معائنہ ءِ کننگ کن فیلڈ کیمپ آتا ہم دورہ ءِ کریر۔ تدوک آ 24 گھنٹہ ٹی انسانی ہمدردی نا بنداو آ 13960 فوڈ پیکٹ و 924 راشن پیک ہرافتے ٹی بنداوی کنوئی آ گڑا و اجناس اوار ئسر، ضرورت مند خاہوت آتیٹی بشخنگا۔ داکان بیدس، پی اے ایف نا فیلڈ ہسپتال آتیٹی میڈیکل ٹیمک 804 ناجوڑ آتے مفت درمان و دوئی نا آسراتی فراوان کریر۔ پاک فضائیہ نا ایمرجنسی رسپانس ٹیمک نوکاپ آن زہمی علاقہ غاتیٹی ریسکیو و ریلیف نا کاریم تیٹی زیات آن زیات بشخ ہلنگ ءُ۔
