اسلام آباد۔ 30 اگست (اے پی پی) بنجائی وزیر واپار نوید قمر نا کماشی ٹی ملک اٹی ٹماٹر و پیماز نا دوئی کننگ نا جاچ ءِ ہلنگ کن دیوان اس مس۔ دیوان اٹی پاننگا کہ بروک آ مسہ تُو اٹی ملک ءِ دا ہڑتوم آ گڑاتا کاختی تون مون تروئی مننگ کیک، ساڑی آ نوکاپ فصل آتے بھاز زیات نسخان تسنے ہرانا نتیجہ ٹی دا گڑاتا نہاد آتیٹی ودکی و اوفتا کاختی گمانی ءِ۔ دیوان اٹی بشخ ہلوک آک دا ہیت آ امنا کریر کہ ٹماٹر و پیماز نا درآمد آن گڑاتا نہاد آتیٹی سوگوی و مارکیٹ اٹی دوئی کننگ ءِ پک کننگ اٹ کمک رسینگک۔ پیماز و ٹماٹر نا درآمد ءِ پین آسان جوڑ کننگ کن وزارت واپار، وزارت قومی غذائی رکھ و پٹ وپول و ایف بی آر اواری اٹ کاریم کیرہ۔ داکان بیدس، او مارکیٹ اٹی گڑاتا فراوانی ءِ پک کننگ کن ہڑدے ئی حالیت آتا چاروکی ءِ کیرہ۔ دیوان اٹی پاننگاکہ پرائیویٹ سیکٹر ہڑتوم آ گڑاتے سپلائی و درآمد کیک۔ داکان بیدس، اقتصادی رابطہ کمیٹی ءِ اسہ سلاہ اس پیش کننگک کہ ٹماٹر و پیماز نا درآمد آ لیویز و ڈیوٹی تیٹی اِلنگ نا موکل تننگے، تانکہ دا گڑاک کم نہاد آ مارکیٹ اٹی ملر۔ دیوان اٹی دا ہیت آ گپ وتران کننگاکہ ایران و اوغانستان آن درآمد آتیان زرمبادلہ غا کم آن کم اثر تمک انتئے کہ دا ملک آتون واپار آ خصوصی بست وبند ساڑی ءِ۔ بنجائی وزیر واپار نوید قمر پارے کہ ٹماٹر و پیماز نا صارف آتے دوئی کننگ ءِ پک کننگ کن دمدستی گام گیج کننگے و اوفتا نہاد آتیٹی سوگوی کن ہرممکن کوشست کننگے۔ واپاری سلاہکار و واپاری اتاشی تا کمک اٹ وزارت واپار کم آن کم وخت اٹی بست وبند کننگ کن پیشن نا ملک درملکی حکومت آتون رابطہ ٹی ءِ۔ وزارت قومی غذائی رکھ و پٹ وپول غٹ اسٹیک ہولڈر آتون اواری اٹ ملک اٹی غذائی رکھ انا حالیت آتا چاروکی ءِ برجاتخک و ملک اٹی خور انا دوئی کننگ ءِ پک کننگ کن گام گیج کیک۔
