اقوام متحدہ۔ 30 اگست (اے پی پی) اقوام متحدہ نا سیکرٹری جنرل انتونیوگوتریش نا ترجمان سٹیفن ڈوجارک پارے کہ اقوام متحدہ پاکستانی حکومت تون اواری اٹ نوکاپ زہمی تا گرج آتے پورو کننگ کن دمدستی کمکی سرجزآتیکن 160 ملین امریکی ڈالر نا فلیش اپیل نا ڈٹ اس جوڑ کننگ والا ءِ۔ اوپارے کہ اقوام متحدہ نا ٹیم مچ آ پاکستان اٹی ترند پِر و نوکاپ تون مون تننگ کن تینا ردعمل ءِ ترند کننگ ءِ ہراٹی مبینہ وڑاٹ اسہ ہزار آن زیات بندغ زوال کرینو۔ اوپارے کہ دا اپیل سے شنبے نادے بیک وخت جنیوا و اسلام آبادآن بناکننگک۔ اوپارے کہ اقوام متحدہ مہالو آن نوکاپ زہمی تیکن کم و ود 7 ملین ڈالر جمع کرینے ہراٹی ساڑی پروگرام و وسیلہ غاتیٹی بھاز المی گرج آتے پورو کننگ اوار ءِ۔ اوپارے کہ برجا کمک اٹی خور انا کمک و غذائیت ، طبی گڑا و خذمت، رکھ دیر، زچکی نا جان جوڑی نا امداد، ساہدار تا ویکسی نیشن و پناہ گاہ اوار ءِ۔ ترجمان پارے کہ داکان بیدس ، اقوام متحدہ نا سینٹرل ایمرجنسی رسپانس فنڈ جان جوڑی، غذائیت، خور، دیر، سفائی ستھرائی وحفظان جان جوڑی نا خذمت فراوان کننگ کن 3 ملین ڈالر جتا کرینے ہرافتا غٹ آن زیات گرج ءِ۔
