اسلام آباد۔ 30 اگست (اے پی پی) چین نا صدر شی جن پنگ و وزیراعظم لی کی چیانگ پاکستان اٹی نوکاپ آن جانی و مالی نسخان تیا پاکستان نا سرکڑدہ و الس تون است ہسونی و پبی یکجہتی نا درشانی ءِ کرینو۔ پاکستان اٹی چین نا سفیر نونگ رونگ چین نا صدر و وزیراعظم نا خصوصی کلہو ءِ صدر مملکت ڈاکٹر عارف علوی و وزیراعظم محمد شہباز شریف ءِ سرکرے۔
سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف چین نا صدر شی جن پنگ و وزیراعظم لی کی چیانگ کن نیک است خواہی تا درشانی ءِ کرے۔ وزیراعظم پارے کہ ہروار آنبار چین نا سرکڑدہ و الس پاکستان سنگتی و است بھلنی نا درشانی ءِ کرینو۔ اوپارے کہ او صدر شی جن پنگ و وزیراعظم لی کی چیانگ نا است انا حب اٹ منتواری ءِ ہرفک۔
یات سلے کہ چین نا کنڈآن پاکستان نا نوکاپ نا زہمی تیکن 100 ملین یو آن(آرایم بی) کمک نا پڑو کننگانے۔ چین نا کنڈآن 25000 تمبو و ایلو کمکی گڑاتا عطیہ کننگانے۔ چینی فضائیہ نا جہاز 300 تمبو تا اولیکو کھیپ ءِ اتسا اینو و پگہ کراچی آ سرمریرہ۔ پاکستان اٹی چین نا سفیر نونگ رونگ کراچی ٹی کمکی گڑا تے پاکستانی کمامدارآتا دوٹی ایتک۔ چین نا کنڈآن نوکاپ نا زہمی تیکن کمک نا فراوانی نا بابت اقتصادی امور ڈویژن ءِ چین نا سفیر نا کراچی آن پدی بننگ آ باضابطہ معلومدار کننگک۔ چین نا سفیر نونگ رونگ چین نا سرکڑدہ نا فیصلہ غان حکومت پاکستان ءِ معلومدار کرے۔
