اسلام آباد۔ 29 اگست (اے پی پی) بنجائی وزیر خزانہ مفتاح اسماعیل پارینے کہ پاکستان مسلم لیگ (ن) و سیوتی جماعت آک تینا سیات ءِ گہیو تخسا پاکستان ءِ خواتہ مننگ آن بچفینو، عمران خان نا ایما غا شوکت ترین پنجاب و خیبرپختونخوانا وزیر خزانہ ءِ فون کرسا ریاست مخالف گام آتیا ہشکاتس، پاکستان نا فائدہ نا برخلاف درملکی ادارہ ءِ چٹھی اس نوشتہ کننگ غداری اسے، شوکت ترین د فون ریکارڈنگ نا مون آ بننگ آن پد سیاست ءِ بایدے اِلے، خیبرپختونخوا نا وزیر خزانہ تیمور جھگڑا دمدستی بایدے استیفہ ایتے، عمران خان نا تدوک آ 10 سال آن کے پی کے ٹی حکومت ءِ، اینو اسکان اسہ ہم بھلو اسکول، کالج ، یونیورسٹی یا ہسپتال اس جوڑ کننگ کتنے، الس بجلی نا بل آتیا ہرا فیول ایڈجسٹمنٹ چارجز تننگ ءِ دا پی ٹی آئی دور انا ہلوک آ کبین فیول نا سوب ءِ۔ او دوشنبے نادے آ پی ٹی وی ہیڈکوارٹر اٹی پریس کانفرنس آن تران کریکہ۔ بنجائی وزیر مفتاح اسماعیل پارے کہ تدوک آ چار دے آن وزیراعظم نوکاپ زہمی تتون ملنگ ءِ، سندھ بلوچستان و خیبرپختونخوا نا دورہ ءِ کرینے، ہراڑے وزیراعظم سرمفننگ ءِ ہموڑے ایلوراہشونک ہِننگ ءُ، مریم نواز ہم چندی علاقہ غاتا دورہ ءِ کننگ ءِ، وزیراعظم 15 ارب سندھ و 7 ارب بلوچستان ءِ تننگ نا پڑو کرینے، داسہ زر انا پین ڈیمانڈ بننگ ءِ، ننا وسیلہ غاک محدود ءُ۔ اوپارے کہ ترند پِر و نوکاپ نا سوب آن مخلوق نا ساہدارک کسکر ، اُرا و فصل آک بھس مسر، دا مشکل حالیت آتیٹی پی ٹی آئی تموک ءُ حرکت اس کرے۔ شوکت ترین نا آڈیو مون آ بسنے ، ہراٹی شوکت ترین پنجاب نا وزیر خزانہ محسن لغاری ءِ پارے کہ آئی ایم ایف ءِ پاہ کہ ننا نسخان مسنے و اسہ چٹھی اس ہم نوشتہ کہ ہراڑآ محسن لغاری ورندی تس کہ اوڑآن ننا ریاست ءِ نسخان تو مفک؟ ہندا وڑ وزیر خزانہ خیبرپختونخوا تیمور جھگڑا ءِ پارے کہ انت نی چٹھی اس جوڑ کرینس ، ہراڑآ تیمور جھگڑا پارے کہ داسہ جوڑ کیوہ، شوکت ترین فون آ کرینگ تس، دا مچ آ باندات نا ماسٹر مائنڈ شوکت ترین ءِ۔ اوپارے کہ ننے تو نواز شریف ، شاہد خاقان عباسی و ایلو مخلوق پاریرہ کہ حکومت ءِ ہلپہ ، ای ہم حکومت جوڑ مننگ آن مست شہباز شریف ءِ معلومدار کریسٹ کہ ملک خواتہ مسنے، پیٹرول و بجلی نا نہاد آتے ودفوئی مریک۔
