اسلام آباد۔ 29 اگست (اے پی پی) پاکستان اوغانستان اٹی امریکی انسداد دہشت گردی ڈرون آپریشن اٹی پاکستان نا فضائی دنگ انا کاریم اٹ اتنگ نا بابت اوغانستان نا قائم مقام وزیر دفاع نا دوبہ غاتیا گڑتی ظاہر کرسا پارینے کہ داوڑنا بیانک سفارتی طرز عمل نا برخلاف ءُ۔ دفترخارجہ نا ترجمان نا کنڈآن جاری بیان نا رداٹ اوغانستان نا کنڈآن شاہدی آن بیدس دُن کہ تینٹ اوغان وزیر امنا کرینے، داوڑنا قیاس آرائی تیا مبنی دوبہ غاک است ہسونی و زموارانہ سفارتی طرز عمل نا اصول آتیان چپ ءُ۔ ترجمان پارے کہ پاکستان غٹ ریاست آتا وتواجہی و علاقائی سالمیت آ تینا یخین نا درشانی ءِ کیک کہ او ہروڑنا دہشت گردی نا مذمت ءِ کیک۔ ترجمان اوغان عبوری کمامدارآتیا زور شاغا کہ او اوغانستان نا کنڈآن کروک آ جہانی قول آتا پوروی ءِ پک کے کہ او تینا گل زمین ءِ اسہ ملک اسے نا ہم برخلاف دہشت گردی کن کاریم اٹ اتنگ کن اِلیپک۔
