چارسدہ ۔29اگست (اے پی پی): مزن وزیر محمد شہباز شریف ءَ گوشت کہ سیلاپءُ ھور ءَ چہ آماچیں ھمک ھاندان ءَ را 25 ہزار کلدار دیگ ءِ کار 3 ستمبر ءَ تاں سرجم کنگ بیت، بیران بوھوکیں سیاد ءُ وارس آناں 10 لکھ کلدار دیگ بوھگ ءَ انت، سندھ ءِ واستہ 15 ارب کلدار وھدیکہ بلوچستان ءِ واستہ 10 ارب کلدار ءِ گرانٹ داتگ، خیبر پختونخوا ءَ آماچیں دمگ آنی تر ءُ تاب سرجم کنگ ءَ چہ پد گرانٹ ءِ جار ءَ جن انت، سیلاپ ءُ ھار ءَ چہ آماچیں گڈی مردم ءِ آسودگ ءُ ایمنی ءَ تاں آرام ءِ دل نہ ننداں۔ دو شمبے ءَ مزن وزیر ءَ سیلاپ ءُ ھور ءَ چہ آماچیں خیبر پختونخوا ءِ ضلع چارسدہ ءِ تر ءُ تاب کت آھودا مزن ویزر ءَ آماچیں مردم آنی واستہ جوڑ کتگیں کیمپ آنی تر ءُ تاب ءُ آماچیں مردم آنی واستہ کیمپ آنی آسراتی ءِ چار ءُ تپاسی گت۔ اے موہءِ سر ءَ مزن وزیر ءَ کیمپ ءَ استیں مردم آنی گوما گپ ءُ تران ھم کت۔ مزن وزیر ءَ آماچیں مردم آناں چیک ھم بھر ءُ بانگ کت۔ مزن وزیر ءَ را بریفنگ دیگ بوت کہ کہ 16 لکھ آباتی ءُ سئے تحصیل آنی چار سدہ ءَ چہ سئے تچوکیں کور گوزیت، ادا آماچیں مردم آنی واستہ تمبو جتگ ءُ کوچگ جوڑ کوتگ۔ اے ضلع ھور ءُ ھار آں چہ پنچ مردم بیران بوتگ وھدیکہ 180 مردم ٹپیگ بوتگ انت۔ ادا تاوان آنی سروے جاڑی انت۔ 11 ہزار ایکٹر پکی ءِ ڈگار آماچ بوتگ انت۔ اے موہءِ سر ءَ پیسریگیں بنجاھی وزیر آفتاب احمد خان شیر پائو، عوامی نیشنل پارٹی ءِصوبائی صدر ایمل ولی خان، جمعیت علماء اسلام (ف) ءِ بنجاھی سروک ءَمزن وزیر ءَ گوشت کہ پی ٹی آئی ھندی گچین کاری ءِواستہ مچی ءُ میڈی کنگ ءَانت پداس ھم کوہستان ءَ پستگیں پنچ مردم آناں در کنگ ءِ واستہ ہیلی کاپٹر نہ اتکگ وھدیکہ ڈی سی ءُ اے سی ءَ آصوبائی حکومت ءِ اے ھوالگ ءَ رابطہ ھم کتگ بوتگ۔ نوں صوبائی وزیر اھوالکاری ءَ بیان داتگ کہ سر وزیر ءِ ہیلی کاپٹر اے کار ءِواستہ نہ انت۔ آئی ءَ مزن وزیر ءَ را گوشت کہ شمے ازمت کار پنجاپ بوتگ نوں پاکستان ءِ ازمت کنوک انت، مارا گوں شما بازیں اوست است صوبائی حکومت ءَ چہ اچ اوست نیست انت۔ مزن وزیر ءَ گوشت کہ ھور ءُ سیلاپ ءَ چہ آماچیں مردم آناں 25 ہزار کلدار ءِ نگدی زر بھر 3 ستمبر ءَ تاں سرجم کنگ بیت ایشی ءِ واستہ 28 ارب کلدار گیشنگ بوتگ۔ بے نظیر انکم سپورٹ پروگرام ءِ ھساب ءُ داد ءِ رد ءَ ادا زر بھر ءُ بانگ بوھگ ءَ انت۔ آئی ءَ گوشت کہ نوشہرہ ءَ ھم نگدی زر بھر ءُ بانگ ءِ کار بندات بوتگ۔ مزن وزیر ءَ گوشت کہ سندھ ءُ بلوچستان ءَ بے کساس تباہی بوتگ، بنجاھ ءَ سندھ ءِ واستہ 15 ارب وھدیکہ بلوچستان ءِ واستہ 10 ارب کلدار پجاری کتگ۔ کالام ، کوہستان ءَ ھوار ایندگر آماچیں دمگ آنی تر ءُ تاب ءَ کنگ ءَ چہ پد خیبرپختونخوا ءَ بوھوکیں تاوان آنی کچ ءُ کساس ءِ جنگ ءَ چہ گرانٹ ءِ جار جنگ بیت۔ آئی ءَ گوشت کہ آ نوشہرہ ءَ ھم شتگ ۔ آئی ءَ گوشت کہ لستیں روچ ءَ چہ پیسر پنچ ءَ بگر تاں شش فٹ آپ بوتگ نوں ایشر جھل کپتگ، اے اللہ پاک ءِ نظام انت۔ آئی ءَ گوشتکہ ھمک ھاندان 25 ہزار کلدار سرجمیں پاکستان ءَ سیلاپ ءُ ھور ءُ ھار ءِ آماچیں مردم آناں بھر ءُ بانگ کنگ بوھگ ءَ انت۔ آئی ءَ گوشت کہ چاریں صوبگ ءُ گلگت بلتستان ءَ اے پروگرام جاڑی انت۔ خیبر پختونخوا ءَ ھور ءُ سیلاپ ءَ چہ 242 مردم بیران بوتگ، لکھانی مردم بے گس بوتگ، کالام ، سوات ، دیر ءَ بے کساس تباہی بوتگ، بیران بوھوکیں مردم آنی سیاد ءُ وارس آناں 10، 10 لکھ کلدار ھمک مردم ءَ را دیگءَ انت۔ این ڈیم ایم اے ءُ صوبگ آنی گوما یکجائی ءَ آماچیں مردم آناں کمک کناں۔ آئی ءَ دل یکیمی دات کہ بنجاھ آماچیں مردم آنی گوما انت۔ گڈی مردم ءِ ایمنی ءُ آسودگی ءَ چہ پیسر ایمنیں دلءَ نہ ننداں۔ آئیءَ گوشت کہ سیلاپءَ چہ کشار آناں تاوان آنی کچ ءُ کساس جنگ بوھگ ءَ انت۔ صوبگ آنی گوما یکجائی ءَ ھرچی بوت کنگ آوانی تاوان آناں پورا کناں۔ مزن وزیر ءَ اے موہءِ سر ءَ سیلاپ ءَ چہ بیران بوھوکیں مردم آں گوں یکوئی ءِ درشان ءُ مرتگیں مردم آنی واستہ پاتیہ وانی ھم کت۔
