مہمند ۔29اگست (اے پی پی): مزن وزیر محمد شہباز شریف ءَ مہمند ڈیم ءَ را سیلاپ ءَ چہ توان آنی پٹ ءُ پول کنگ ءِ حکم دیان ءَ گوشت کہ منصوبگ ءِ سر ءَ کار گیشینتگیں وھد ءُ پاس ءَ سرجم بہ بیت، نیلم جہلم ءَ ھم لستیں ماہ ءَ چہ واکیہ ءِ بوتگ، آیوکیں وھد ءَ ایشانی گر ءُ دار بہ بیت، مئے معیشت گران بہائیں توان پیداک کنگ ءِ مٹ بوت نہ کنت، ایندھن ءِ درآمد ءِ رد ءَ ھمک سال اربانی ڈالر ھرچ کنگ ءَ پد سبسڈی دیگ ءَ چہ ھزانگ ءِ سر ءَ بار پر بیت، آپ ، گوات ءُ روچ ءِ روژنائی ءَ چہ سستائیں توان ءِ پیداک کنگ لوٹ ائیت۔ اے موہ ءِ سر ءَ بنجاھی وزیر پارلیمانی کار مرتضی جاوید عباسی، بنجاھی وزیر اھوالکاری ءُ شنگ کاری مریم اورنگزیب ، مزن وزیر ءِ ھاسیں کمکار انجینئر امیر مقام ءُ جمعیت علما اسلام ف ء، سروک مولانا عطا ء الرحمن ھم ساڑی ات۔ اے ھیالانی درشانی آئیءَ ادا مہمند ڈیم منصوبگ ءِ ھند ءِ تر ءُ تاب ءِ موہ ءَ کت۔ آئی ءَ مہمند ڈیم ءَ چینی ءُ پاکستانی کمپنی یکجائی ءَ جوڑیشت ءِ کار ءَ کنگ ءَانت۔ سک باز ارزشتی ایں منصوبگ ات۔ ایشی ءَ چہ 800 میگاواٹ توان پیداک بیت، آپ شانی ءِ واستہ آپ ءِ دستیابی بیت ءُ سیلاپ ءِ گر ءُ دار ءَ کمک رسیت۔ سیلاپ ءَ چہ ڈیم ءِ بنیاتی کوکار ءُ ٹنلز آناں تاوان سک باز نہ وشیں گپ ات ایشی ءِ پٹ ءُ پول کنائینگ بہ بیت اے وڑ چتور بوتگ، استیں دور ءَ ڈیم آنی ارزشت ءَ چہ بُکگ جنگ بوت نہ کنت۔ دگنیا ءَ ارچ جاہءَ ڈیم جوڑ کنگ بیت آھودا رکھینگی انتظامی ھم کنگ بیت، لستیں ماہ ءَ پیسر نیلم جہلم ءَ یک ٹوھیں واکیہ ءِ بوتگ، ایشی ءِساپ ءُ سلہ ئی ءِ پٹ ءُ پول ءِ حکم داتگ بوتگ، آزاتی ءَ گوں کنسلٹنٹس ءَ چہ ایشی ءِ پٹ ءُ پول کنائینگ بیت تانکہ آیوکیں وھد ءَ اے رنگیں واکیہ ءِ گر ءُ دار کنگ بہ بیت۔ مزن وزیر ءَ گوشت کہ پاکستان درآمدی ایندھن ءِ ھوالگ ءَ اربانی ڈالر ھمک سال ھرچ کنت ءُ گران بھائیں توان پیداک کنگ ءَ چہ کسٹومر آناں سستائیں توان پجاری کنگ ءَ چہ ھزانگ ءِ سر ءَ بار پر بیت ، مارا گوات، روچ ءِ روشنائی ءُ پن توان ءِ پیداوار ءَ را گیش کنگی انت چیا کہ اے مئے آیوکیں باندات انت ، توان ءِ پیداوار ءِ سستائیں وسیلگ ہائیڈل پاور ات، مئے معیشت گران بھائیں توان پیداک کنگ ءِ مٹ بوت نہ کنت۔ مزن وزیر ءَ گوشت کہ چینی کمپنی اے منصوبگ ءِ سر ءَ کار کنگ ءَ انت ءُ چین پاکستنا ء، جوانیں دوست انت۔ منصوبگ آنی وھد ءُ موہ ءِ سر ءَ سرجمی ءِ واستہ شپ ءُ روچ کار کنگ بہ بیت ءُ ایشرا گیشنتگیں وھد ءُ پاس ءَ سرجم کنگ لوٹ ائیت، اے منصوبگ مئے معاشی ءُ راجی دیمروئی ءُ وشھالی ءِ واستہ باز ارزشتی انت۔ سستائیں توان ءَ چہ کشت ءُ کشار، صنعت ءُ الس ءِضلورت سرجم بنت ءُ معیشت ءَ را برجائی رسیت۔ ایشی ءَ چہ پیسر چیئرمین واپڈا لیفٹیننٹ جنرل (ر) سجاد غنی ءُ چینی جوڑیشتی کمپنی ءِ نماھند آناں مزن وزیر ءَ را مہمند ڈیم منصوبگ ءِ دیمروئی ءُ سیلاپ ءَ چہ بوھوکیں تاوان آنی ھوالگ ءَ بریفن دات۔ مزن وزیر ءَ گوشگ بوت کہ اے منصوب دریائے سوات ءِ سر ءَ جوڑ کنگ بوھگ ءَ انت ءُ ایش 800 میگاواٹ توان پیداک بیت ءُ ءُ 18 ہزار ایکڑ ءَ چہ گیش زمین سیراپ بیت، ڈیم ءِجوڑیشت ءَ چہ سیلاپ ءِگر ءُ دار ءَ کمک رسیت۔ سیلاپ ءَ چہ بوھوکیں تاوان آنی برجائی ءِ واستہ کار زوت سرجم کنگ بیت وھدیکہ سیکرٹری آپی آسراتی کاظم نیاز ءَ نیلم جہلم ہائیڈل پاور پراجیکٹ ءِ واکیہ ءِ انٹرنیشنل کنسلٹنٹس ءَ را ساپءُ سلہ ئی ءِ گوما پٹ ءُ پول کنائینگ ءِ ھوالگ ءَ مزن وزیر ءَ را سرپد ءُ سئیگ کت۔ مزن وزیر ءَ مہمند ڈیم ءِ سائٹ ءِ ھم چار ءُ تپاسی کتءُ سیکرٹری آپی آسراتی ءُ چیئرمین واپڈا ءَ چہ جوڑیشتی کار آنی بابت ءَ مالومداری در جت۔
