پشاور۔ 29 اگست (اے پی پی) وزیراعظم محمد شہباز شریف دوشنبے نادے آ داڑے نوکاپ زدگان ریلیف کیمپ انا دورہ ءِ کرے ہراڑے او چناتتون اوار نوکاپ زدگان آتون ملا و اوفتے حکومت نا کنڈآن ہرممکن کمکاری نا باور کرفے۔ نوکاپ زہمی تتون گپ وتران کرسا وزیراعظم ضلع نوشہرہ نا نوکاپ آن زہمی مخلوق تون ہمدردی نا درشانی ءِ کرے و باوری کرفے کہ حکومت اوفتا بحالی و آبادکاری کن ہرممکن کوشست کیک۔ شہباز شریف پارے کہ حکومت آخیریکو نوکاپ زدگان نا بحالی و آبادکاری اسکان تینا کوشست آتے برجاتخک۔ اوپارے کہ بنجائی و صوبائی حکومت آک، پاکستان نا فوج ، این ڈی ایم اے و ایلو قومی تعمیراتی محکمہ غاک نوکاپ زدگان اسکان سرمننگ و اوفتے ہلہلہ بنداو تیا المی کمک فراوان کننگ کن تین پہ تینی کمکاری اتون کاریم کننگ اٹی ءُ، نوکاپ آن بھس مروک آ سڑک آتے اول سرآن تفنگک۔ وزیراعظم اومیت ظاہر کرے کہ ملک نوکاپ نا ساڑی حالیت آتیان سرسہبی اٹ پیش تمک و زہمیک تینا ہڑدے ئی زند انا کنڈآ پدی بریرہ۔ وزیراعظم کیمپ انا تہہ ٹی نوکاپ زہمی تا ویل آتے بِنگ و اوفتے ہرممکن کمکاری نا باور کرفے۔ شہباز شریف زہمی تے پارے کہ او پاکستان نا شونداری و شونہالی و آخبت نا آفت آتیان الس نا رکھ اکن دعا کیر۔ داوخت آ وزیراعظم چناتتون مہرومریبت نا درشانی ءِ کرے۔ بنجائی وزیر مرتضیٰ جاوید عباسی ، وزیراعظم نا سلاہکار انجینئر امیر مقام وایم پی اے اختیارولی ئسک ہم وزیراعظم تون اوار ئسر۔
