چارسدہ۔ 29 اگست (اے پی پی) وزیراعظم شہباز شریف پارینے کہ دا سیاست ناآخا ڈکھیائی انسانیت نا دوتے ہلنگ نا وخت ءِ، ہراتم اسکان نوکاپ آن زہمی آخیریکو اُرا آباد مفک آسرات تولپنہ، سنگت ملک آک و جہانی ادارہ غاک نوکاپ زہمی تا کمک ءِ کمک کننگ اٹی ءُ، سخیک ہم مون آبریر و زہمی تا کمک ءِ کیر۔ اوداخیال آتا درشانی ءِ دوشنبے نادے آ داڑے سپورٹس کمپلیکس چارسدہ ٹی نوکاپ زہمی تا کمکی کیمپ انا دورہ نا وخت آمیڈیا تون گپ وتران کرسا کرے۔ داوخت آ بنجائی وزیر حوالکاری و شینکاری مریم اورنگزیب، وزیراعظم نا خصوصی کمکار انجینئر امیر مقام، قومی وطن پارٹی نا سروک آفتاب احمد خان شیرپاؤ، عوامی نیشنل پارٹی نا راہشون ایمل ولی خان، سیوتی جماعت آتا راہشون و ایلو تعلقدار ادارہ غاتا آفیسر آک ہم ساڑی ئسر۔ وزیراعظم ءِ نوکاپ نا حالیت و کمکی سرجزآتا بارواٹ حوال تننگا، وزیراعظم کیمپ انا چندی بشخ آتا دورہ ءِ کرے و نوکاپ زہمی تیان اوفتا ویل آتے معلوم کرے۔ وزیراعظم پارے کہ نوشہرہ، چارسدہ و ایلو علاقہ غاتیٹی نوکاپی دیر بھاز بھسکاری کرینے، خیبرپختونخوا ٹی پِر و نوکاپ آن 242 بندغ زوال و سد آک ٹھپی مسنو ، کالام ، دیر، سوات، کوہستان و ایلو علاقہ غاتیٹی مروک آ طوفانی پِر تیان دریانا کنارہ ماڑی و ہوٹل آک دریا نا گواچی مسنو ، فصل آتے نسخان رسینگانے، لکھ آ اُرا جزوی یا پورو وڑاٹ بھس مسنو، سڑک و پول آتے دیر درینے۔ وزیراعظم پارے کہ تدوک آ 30 سال اٹی داخہ زیات پِر متنے، بنجائی و صوبائی حکومت آک، این ڈی ایم اے و پی ڈی ایم اے پاکستان نا فوج اتون اواری اٹ امداد و بحالی نا کاریم کننگ اٹی ءُ، سندھ اٹی شکارپور، سکھر، لاڑکانہ، نوڈیرو وایلو علاقہ غاتیٹی ہر کنڈآ دیر ہی دیر ءِ، بلوچستان اٹی نصیر آباد،قلات، قلعہ سیف اللہ، چمن و ایلو علاقہ وخت اس کہ سویلی پنجاب اٹی ہم نوکاپ بھاز بھسکاری کرینے، بنجائی حکومت زہمی تا دمدستی کمک کن 28 ارب روپئی جاری کرینے ، بے نظیر انکم سپورٹ پروگرام نا کمک اٹ 25، 25 ہزار روپئی بشخنگ انگ ءِ، بلوچستان و سندھ آن پد خیبرپختونخوا ٹی ہم دانا بناءِ کننگانے، زوال کروک آ بندغ آتا خاہوت آتے 10، 10 لکھ روپئی نا زرتننگ انگ ءِ، اینو ہم گڑاس خاہوت آتیٹی دا زر ءِ بشخنگانے۔ اوپارے کہ نوشہرہ ٹی کمکی کیمپ اٹی خور و درمان تون اوار غٹ آسراتی تا بست وبند ءِ کننگانے چارسدہ ٹی ہم دوائی، خور و ایلو آسراتی تے فراوان کننگ انگ ءِ ، این ڈی ایم اے ، پی ڈی ایم اے ، بنجائی حکومت و صوبہ غاک اواری اٹ دا آفت آن ودی مروک آ حالیت آتا مقابلہ ءِ کیرہ، نوکاپ و پِر تیان 3 کروڑ 30 لکھ آن زیات بندغ زہمی مسنو، پاکستان نا فوج اِرا لکھ بندغ ءِ ہیلی کیپٹر و کشتی تا کمک اٹ رکھ ہند آتیا سرکرینے، پول و سڑک آتا بحالی کن ہم گام گیج کننگ انگ ءِ ، نوکاپ زہمی تا کمک کن گچین بست وبند آتیا غٹ صوبہ و گلگت بلتستان نا حکومت ءِ خراج تحسین پیش کینہ، نوکاپ و پِر تیان جم وڑاٹ اسہ ہزار آن زیات بندغ آک زوال کرینو، ایران، ترکی و متحدہ عرب امارات نا صدر آتون ہم ہیت مسنے اوفک نوکاپ آن مروک آ نسخان تیا ہڑزخواہی و ہمدردی نا درشانی ءِ کرینو، امداد نا پڑو ہم کرینے دا چرجوئی ٹی کمکی گڑا سرمننگ بناکرینے، برطانیہ ہم نوکاپ زہمی تیکن نغد امدادنا پڑو کرینے وخت اس کہ جہانی بینک، جاہنی ادارہ خور و ایلو ادارہ غاتیان ہم امداد کن کلہو ملنگ ءِ۔ اوپارے کہ زوت کوہستان، کالام، سوات، و دیر انا ہم دورہ ءِ کیوہ، نوکاپ زہمی تا کمک و بحالی کن گام گیج آتیا انتظامیہ ءِ خراج تحسین پیش کینہ، داوخت سیاست نا اف ڈکھیائی انسانیت نا دوتے ہلنگ نا ءِ۔ خواری اٹ ننے تینا حق ءِ ادا کروئی ءِ، زہمی علاقہ غاتے آفت زدہ گوندنگک، غٹ سیوتی اواری اٹ زہمی تا اُراتے آباد کینہ و آخیریکو اُرا آباد مننگ اسکان آسرات تولپنہ۔ اوپارے کہ سخیک ہم مصیبت اٹی تموک نوکاپ زہمی تا کمک ءِ بایدے کیر و اوفتے کن خور، دوائی، تمبو و ایلو آسراتی تا فراوانی ٹی کمک کیر، دا انسانیت نا بھاز بھلو خذمت اس مریک۔
