پشاور۔ 29 اگست (اے پی پی) وزیراعظم محمد شہباز شریف دوشنبے نادے آ داڑے نوکاپ آن زہمی ضلع نوشہرہ نا دورہ ءِ کرے ہراڑے او برجا ریسکیو و ریلیف آپریشن تا جاچ ءِ ہلک۔ وزیراعظم تعلقدار کمامدار آتے پارت کرے کہ مخلوق ءِ بچفنگ و اوفتے دمدستی وڑاٹ رکھ ہند آتیا گدریفنگ کن غٹ دوئی وسیلہ غاتے کاریم اٹ اتنگے۔ وزیراعظم تون اوار بنجائی وزیر مرتضیٰ جاوید عباسی، وزیراعظم نا سلاہکار سیاسی و السی امور و قومی میرات انجینئر امیر مقام، پاکستان مسلم لیگ (ن) کے پی کے ترجمان و صوبائی اسمبلی نا باسک اختیار ولی و ایلوراہشونک ہم ئسر۔ چیف سیکرٹری خیبرپختونخوا ڈاکٹر شہزاد بنگش، ڈپٹی کمشنر نوشہرہ ، این ڈی ایم اے و پی ڈی ایم اے نا کمامدارآک وزیراعظم ءِ 27 اگست نا تباہ کن نوکاپ آن پد ضلع نوشہرہ ٹی برجا ریسکیو ، ریلیف و بحالی نا کارروائی تا بارواٹ حوال تسر۔ وزیراعظم ءِ دریائے کابل اٹی نوکاپ نا ساڑی حالیت آتیان معلومدار کننگا۔ وزیراعظم ءِ پاننگاکہ نوشہرہ نا تحصیل جہانگیرہ، پبی ٹی نوکاپ زہمی تیکن 70 ریلیف و 11 میڈیکل کیمپ خلنگانے ہراڑے زہمی تے کمک فراوان کننگ انگ ءِ۔ وزیراعظم ءِ پاننگا کہ تربیلا ڈیم انا دیر ءِ تورفنگ آن دریائے کابل اٹی نوکاپی ریلہ پین نسخان تننگ آن بیدس گدرینگا۔ وزیراعظم ضلع نوشہرہ ٹی مردان پول آن نوکاپی حالیت آتا ہم جاچ ءِ ہلک۔
