نوشہرہ۔ 29 اگست (اے پی پی) وزیراعظم محمد شہباز شریف پارینے کہ نوکاپ زہمی تا بحالی کن بنجائی و صوبائی حکومت آک اواری اٹ کاریم کننگ اٹی ءُ، زہمی تے دمدستی وڑاٹ 25، 25 ہزار روپئی نا مالی کمک تننگ انگ ءِ۔ دوشنبے نادے آ داخیال آتا درشانی ءِ وزیراعظم نوشہرہ ٹی نوکاپ آن زہمی تیکن کمکی کیمپ انا دورہ نا وخت آ کرے۔ داوخت آ وزیراعظم کیمپ اٹی رہینگوک آ زالبول و چناتیان کن و خور و ایلو آسراتی تا فراوانی نا بارواٹ اَریفے۔ اسہ زالبول اس لیپ انا عدم فراوانی نا غاو کرے ہراڑآ وزیراعظم دمدستی وڑاٹ اودے میٹرس فراوان کننگ نا پرمان کرے۔ وزیراعظم پارے کہ نن غٹ اواری اٹ زہمی تا بحالی کن کاریم کننگ اٹی اُن۔ زوال کروک آ بندغ آتا خاہوت آتے بنجائی حکومت نا کنڈآن 10، 10 لکھ روپئی نا مالی کمک تننگ انگ ءِ۔ اوپارے کہ انشاء اللہ حالیت آک زوت گچین مریرہ۔ داوخت آ وزیراعظم نوکاپ زہمی تا مشکل آتا چٹفنگ و ملک اکن دعاہم کرفے۔
