مزن وزیر  شہباز شریف ءَ سکھر ءَ سیلاپ ءَ چہ آماچیں مردم آنی کیمپ ءِ چار  ءُ تپاسی  کت، سیلاپ ءَ چہ تاوان،  آماچیں مردم آنی  برجائی ءِ  گامگیج  آنی  ھوالگ ءَ  بریفنگ دیگ بوت

اسلام آباد۔26اگست  (اے پی پی): مزن وزیر محدم  شہباز شریف ءَ سکھر ءَ سیلاپ ءَ چہ  آماچیں مردم آنی  واستہ جتگیں  کیمپ ءِ چار ءُ تپاسی کت۔  آدینگ ءِ روچ ءَ   مزن وزیر محمد شہباز شریف  سندھ ءِ سیلاپ ءَ  چہ آماچیں مردم آنی  واستہ یک روچی تر ءُ تاب ءَ سکھر ءَ  پج اتگ۔ بنجاھی وزیر اھوالکاری ءُ شنگ کاری  مریم اورنگزیب  ،  بنجاھی وزیر  توان  انجینئر خرم دستگیر  ھم آئی ءِ ھمبراہ ات وھدیہ وزیر ءِ درئی کار بلاول بھٹو زرداری ، بنجاھی وزیر آپی   آسراتی  سید خورشید  شاہ ءُ  سر وزیر سندھ  مراد علی شاہ  ءَ بیگم  نصرت بھٹو ائیر پورٹ سکھر  ءِ سر ءَ مزن وزیر ءَ  آرا وش اتک کت۔  مزن وزیر ءَ را سیلاپ ءِ آماچیں مردم آنی چار ءُ گزار ءِ واستہ جتگیں  فری میڈیکل کیمپ ءِ تر ءُ تاب کنائینت۔  سکھر ضلعی انتظامیہ ءُ پی ڈی ایم  اے ءِ نماھندگ  ءَ سیلاپ ءَ چہ  بوھوکیں تاوان ءُ آماچیں مردم  آنی برجائی ءِ واستہ  کتگیں گامگیج  آنی بابت ءَ بریفنگ دات۔  مزن وزیر ءَ را گوشگ بوت کہ سیلاپ ءَ چہ انفراسٹرکچر  ءُ کشار تباہ بوتگ انت۔  آماچیں مردم آنی  واستہ 90 ماڑی آنی تہءَ ادارُکی نندگ جاہ جوڑ  ءُ  میڈیکل ٹیمب  ءُ موبائل  ہسپتال  ھم کار کنگ ءَ انت، پی ڈی ایم اے  ءُ این ڈی ایم  اے ءَ آماچیں  مردم آنی  باز کمک کتگ۔  ایشی ءَ چہ  ا بید پاکستان آرمی  ءُ نیوی  ھم  گیشاں چہ گیش کمک پجاری کنگ ءَ انت۔  مزن وزیر  ءَ آماچیں مردم آنی  برجائی  ءِ واستہ   کتگیں گامگیج   ءُ لوٹ آنی ھوالگ ءَ سرپد  کنگ بوت۔