صوبہ سندھ و بلوچستان اٹی بھسکاری حالیت آتون مون تننگ کن قومی جوزہ ءِ نشان تروئی مریک،  نوکاپ نا زہمی تا کمک کن مچ آ قوم خاص وڑاٹ پیشن نا ملک پاکستانی تا عطیہ غاتا گرج ءِ، بنجائی وزیر حوالکاری وشینکاری مریم اورنگزیب

اسلام آباد۔ 25 اگست (اے پی پی) بنجائی وزیر حوالکاری وشینکاری مریم اورنگزیب نوکاپی حالیت آتے قومی ایمرجنسی گوندسا پارینے کہ صوبہ سندھ و بلوچستان اٹی بھسکاری تا حالیت آتون مون تننگ کن قومی جوزہ ءِ نشان تروئی مریک، زہمی نوکاپ نا کمک کن مچ آ قوم خاص وڑاٹ پیشن نا ملک پاکستانی تا عطیہ غاتا گرج ءِ۔ پنچ شنبےنادے آ تینا بیان اٹی وزیر حوالکاری مریم اورنگزیب پارے کہ بھلو کچ اسے آ مروک آ بھسکاری نا سوب آن بھلو زر اس درکار مریک، بنجائی حکومت، صوبہ غاتون اواری اٹ پبی کوشست کننگ ءِ ، وسیلہ غاتے موبلائز کننگ انگ ءِ۔ ترند پِر و نوکاپی دیر تا سوب آن ریلیف ناکاریم تیٹی مشکل بننگ ءِ۔ الس نا کمک آن زہمی تا ریسکیو وریلیف نا عملءِ ترند کننگ مریک۔ اوپارے کہ وزیراعظم فلڈ ریلیف اکاؤنٹ 2022 اٹی عطیہ جمع کرفنگ نا سرجم آتے مہالوآن جاری کننگانے۔ تہہ و پیشن ملک پاکستانی عطیہ غاتے اکاؤنٹ (Prime Minister Relief Fund Account 2022 Account No. ‘G-12164) اٹی جمع کرفنگ کیرہ۔ وزیر حوالکاری مریم اورنگزیب پارے کہ مصیبت اٹ تموک اہل وطن ننا کمک نا چاری ءُ، ببو نن غٹ مرین سیبو، پیشن نا ملک پاکستانیک واٹرٹرانسفر، منی سروس  بیورو، منی ٹرانسفر آپریٹر و ایکسچینج ہاؤس آتا کمک اٹ ہم عطیہ غاتے گدریفنگ کیرہ۔ عطیہ غاتے غٹ کمرشل بینک آتیٹی نغد ہم جمع کرفنگ مریک۔ اوپارے کہ بینک آتا ڈراپ باکس اٹ کراس چیک، موبائل و انٹرنیٹ بینکنگ ، اے ٹی ایم، اے بی ایف ٹی، راست انا کمک اٹ ہم جمع کرفنگ مریک۔