چین نا حکومت نوکاپ نازہمی تیکن ریڈ کریسنٹ سوسائٹی نا کمک اٹ پاکستان ءِ مالی کمک فراوان کرینے، چینی سفیر نا بنجائی وزیر صنعت و پیداوار تون اوڑدہی ٹی گپ وتران

اسلام آباد۔ 25 اگست (اے پی پی) پاکستان اٹی چین نا سفیر نونگ رونگ پارینے کہ چین نا حکومت نوکاپ آن زہمی علاقہ غاتیٹی کمکی کارروائی تیکن ریڈ کریسنٹ سوسائٹی نا کمک اٹ پاکستان ءِ مالی کمک فراوان کرینے وخت اس کہ پاکستان اٹی کاریم کروک آ چینی کمپنی تے ہم نوکاپ آن زہمی بندغ آتا امداد کن متحرک کننگانے۔ اوداہیت ءِ پنچ شنبے نادے آ داڑے بنجائی وزیر صنعت و پیدوار سید مرتضیٰ محمود تون اوڑدہی ٹی گپ وتران کرسا پارے۔ اوڑدہی ٹی ہڑتوم آ کنڈآتا است خواہی و پاک چین کمکاری نا بابت امور نا جاچ ءِ ہلنگا۔ بنجائی وزیر صنعت و پیداوار پارے کہ ساڑی آ پِر و نوکاپ آن نہادی انسانی جان تا نسخان تون اوار اوار کشت وکشار ءِ بھلو نسخان اس رسینگانے، نوکاپ آن زہمی علاقہ غاتیٹی فصل آک بھاز بے وڑ زہمی مسنو۔ اوپارے کہ ہڑتوم آ ملک آک برآمدی زون تا بابت مریس میعاد پالیسی تا کمک اٹ خیال آتا ہل و تس و سلاہ تننگ کیرہ انتئے کہ چین اٹی داوخت آ 700 نا خڑک ہندن ءُ زون ارے، پاکستان اٹی داوخت آ 8 نا خڑک برآمدی زون آپریشنل ءُ۔ بنجائی وزیر پارے کہ پاکستان داوخت آ چین ءِ خیسن آ مرچ برآمد کننگ ءِ اوٹی پین ودکی نا کچ و گنجائشت ارے۔ چین نا سفیر باوری کرفے کہ چین نا حکومت پوسکن آ ٹیکنالوجی و تربیت یافتہ مینجمنٹ نا کمک اٹ پاکستان اٹ کشت وکشار نا مون آ دننگ و فصل آتا پیدوار اٹی ودکی کن کمک فراوان کیک۔ بنجائی وزیر صنعت و پیداوار پارے کہ پاکستان اٹی داوخت آ چین نا آٹو موبائل کمپنی کاریم کننگ ءُ، اوپاکستان اٹی پین چینی زرکاری نا گرج آ زور شاغا و پارے کہ پاکستان اٹی اڑزآن افرادی قوت و مسابقتی مارکیٹ دوئی ءِ۔ پاکستان اٹی پین چینی زرکای آن ملکی پیدوار اٹی ودکی نا کوشست آتیٹی کمک رسینگک۔ اوچینی سفیر ءِ 1500 ایکڑ آ تالان دھابیجی خصوصی اقتصادی زون اٹی چینی انڈسٹری نا جوڑ کننگ نا ہم سلہ خلک و پارے کہ چینی کمپنیک داکان دوئی پیدوار ءِ مچ آ دنیا ٹی برآمد کننگ کیرہ ۔