دوحہ۔24اگست (اے پی پی): مزن وزیر محمد شہباز شریف ءَ گشتگ کہ مارا پھر اِنت کہ فیفا ورلڈ کپ قطر 2022 ءِآفیشل میچ بال “الریحلہ”پاکستان ءَ جوڑ کنگ بوتگ۔ اے ھیالانی درشانی آئی ءَ چارشمبے ءِ روچءَ فیفا ورلڈ کپ سٹیڈیم 974 ءِ ترء ُتاب کنگ ءِ موہ ءَ کتگ۔ اے موہ ءَ مزن وزیر ءَ را ورلڈکپ ءِ چِن ء ُ لانچانی ہوالگءَ شونست دیئگ بوتگ ۔ سٹیڈیم ءَ سر بوہگءَ مزن وزیرءَ سٹیڈیم ءِ گائیڈڈ ترء تاب کنائینگ بوتگ ء ُ آئی ءَ را فیفا ورلڈ کپ 2022 ءِ مہمان جہلی کنگءِ ھاترءَ گتر ءِ حکومت ءِ نیمگ ءَ چہ کتگیں چِن ء ُ لانچانی ہوالگءَ حال دیئگ بوتگ۔ مزن وزیر ءَ دنیا ءِ درستاں چہ مستریں لیب ءِ ایونٹ ءِ ھاترءَ جدید تریں آسراتی ءِ جوڑ کنگءَ گترءِ کوشستاناں ساڑاتگ۔ مزن وزیر ءَ گترءِ اُلس ء ُ حکومت ءَ را میگاایونٹ ءِ برجم دارگ ءَ سوبمندی ءِ وائشت ءِ درشانی کتگ۔ مزن وزیر ءَ ورلڈ کپ ءَ چہ ہمگرنچیں ڈھانچہ ءِ جوڑ کنگ ءَ پاکستانی مردمی طاقت ءِ حاسیں کردءَ راساڑاتگ۔ مزن وزیر ءَ گشتگ کہ پاکستانی آناں اے راستی ءِ سرءَ پھر اِنت کہ فٹ بال “الریحلہ” فیفا ورلڈ کپ قطر 2022 ءِآفیشل میچ بال پاکستان ءَ جوڑ کنگ بوتگ۔
