وزیراعظم محمد شہباز شریف نا قطر انا وزیراعظم تون اوڑدہی، ہڑتوم آ کنڈآتا تعلقداری و اسیجائی است خواہی نا علاقائی و جہانی امور آ گپ وتران کریر

دوحہ۔ 24 اگست (اے پی پی) وزیراعظم محمد شہباز شریف دوحہ ٹی قطر انا وزیراعظم و وزیر داخلہ شیخ خالد بن خلیفہ بن عبدالعزیز الثانی تون اوڑدہی کرے۔ اوڑدہی تی گپ وتران اٹی ہڑتوم آ راہشونک تینا تینا ڈل آتا کماشی ءِ کریر۔ اوہڑتوم آکنڈآتا تعلقداری تا جاچ ءِ ہلکر و اسیجائی است خواہی نا علاقائی و جہانی امور آ گپ وتران کریر۔ ہڑتوم آ ملک آتا نیام اٹ رابطہ غاتیٹی ودوک آ رفتار آ است جمی نا درشانی ءِ کرسا ہڑتوم آ راہشونک ہڑتوم آکنڈآتا کمکاری ، خاص وڑاٹ واپار و زرکاری نا بشخ آتیٹی کمکاری  ءِ پین ودفنگ نا عزم انا درشانی ءِ کریر۔ وزیراعظم سے شنبے نادے آ سرکاری دورہ غا دوحہ آ سرمس۔ اوڑتون اوار کابینہ نا سینئر باسک آک ہم ئسر۔ وزیراعظم توانائی نا بشخ بشمول قابل تجدید ذریعہ، انفراسٹرکچر، ہت ودر ، کشت وکشار و لائیو اسٹاک و سیل و سوات اٹی قطر اتون تعلقداری تے ودفنگ و گیشتر کننگ اٹ حکومت پاکستان نا است خواہی نا درشانی ءِ کرے۔ وزیراعظم قطر ءِ فیفا ورلڈ کپ 2022 نا مہمانداری آ مبارکبادی تس و دنیا نا غٹ آن بھلا گوازی تا مقابلہ غاتا اڈتننگ اٹ قطرانا الس و حکومت نا سرسہبی نا است خواہی نا درشانی ءِ کرے۔ وزیراعظم قطر اٹی رہینگوک پاکستانی تا خیال ءِ تخنگ آ قطری سرکڑدہ غاتا منت واری ءِ ہرفے۔ پاکستان نا انسانی وسیلہ غاتا پبی لائخی تے تالان کرسا وزیراعظم پارے کہ او پاکستانی تیکن پین وارخواہی پٹنگ کن قطری سرکڑدہ غاتون کاریم کننگ نا چاری ءِ ہرا تینا مہارت و کاروبار نا کمک اٹ قطر انا شونداری ٹی تینا بشخ ءِ شاغنگ کیرہ۔ اوغانستان اٹی تازہ پیش رفت نا جاچ ءِ ہلسا وزیراعظم تعمیری مشغولیت نا اہمیت و جہانی برادری ءِ انسانی و اقتصادی تنکی تتون مون تننگ کن اوغان الس کن تینا مخ تفی ءِ ودفنگ نا گرج آ زور شاغا۔ وزیراعظم اوغانستان اٹی امن و مفاہمت کن قطر انا کوشست آتون اوار اوار ملک اکن اونا انسانی امداد نا ستاءِ کرے۔ یات سلے کہ پاکستان و قطر انا نیام اٹ دیرینہ برادرانہ تعلقداری ءِ ہرانا ماسک اسیجائی عقیدہ و قدر اتون وار اوار چندی بشخ آتیٹی خڑکی ہڑتوم آ کنڈآتا کمکاری آ تالان ءُ۔ ہڑتوم آ ملک آک علاقائی و جہانی ویل آتیا ہم خڑکی ہم گرنچی تخرہ۔