وزیراعظم شہباز شریف تون شیخ فیصل بن قاسم الثانی نا کماشی ٹی قطر بزنس ایسوسی ایشن نا ڈل انا اوڑدہی

دوحہ۔ 24 اگست (اے پی پی) وزیراعظم محمد شہباز شریف پاکستان و قطر انا خڑکی سیاسی تعلقداری تے اسہ سوگو و جوان ءُ اقتصادی شریداری اسے ٹی بدل کننگ کن قطر اتون کثیر الجہتی تعلقداری تے گیشتر کننگ کن حکومت پاکستان نا عزم انا درشانی ءِ کرینے۔ او چار شنبے نادے آ بزنس ایسوسی ایشن (کیو بی اے) نا ڈل اتون گپ وتران کریکہ ہرا داڑے دوحہ ٹی ایسوسی ایشن نا چیئرمین شیخ فیصل بن قاسم الثانی نا کماشی ٹی اوڑتون اوڑدہی کرے۔ اوڑدہی ٹی کابینہ نا اہم باسک و بڑزکو کمامدارآک ساڑی ئسر۔ قطر بزنس ایسوسی ایشن نا کنڈآن پنی آ قطری کاروباری و کارپوریٹ ایگزیکٹو آک بشخ ہلکر۔ وزیراعظم آفس نا پریس ونگ انا رداٹ وزیراعظم دا ہیت انا درشانی ءِ کرے کہ پاکستان قطر اتون تینا متکن آ برادرانہ تعلقداری تے بھاز اہمیت ایتک و ہڑتوم آملک آتا راجی و اقتصادی شونداری نا اسیجائی است خواہی ءِ۔ وزیراعظم ہڑتوم آ ملک آتا خڑکی سیاسی تعلقداری تے اسہ سوگو و جوان ءُ شریداری اسے ٹی بدل کننگ کن قطر اتون کثیر الجہتی تعلقداری تے گیشتر کننگ کن حکومت پاکستان نا عزم انا درشانی ءِ کرے۔ قطر انا امیر نا ویژنری سرکڑدہ ئی ٹی قطر انا ترند رفتار اقتصادی شونداری و نمو نا ستاءِ کرسا وزیراعظم قطر انا نجی بشخ ءِ متحرک کننگ اٹ قطر بزنس ایسوسی ایشن نا کڑد انا ستاءِ کرے۔ گیشتر اقتصادی شریداری نا اہمیت آ زور شاغسا وزیراعظم پاکستان نا کنڈآن پیش کروک بے پناہ کاروبار و زرکاری نا وارخواہی تے تالان کرے ہرافتے ٹی قابل تجدید ذریعہ، فوڈ سیکورٹی، صنعتی و بنداوی پنجر نا شونداری ، انفارمیشن ٹیکنالوجی ، سیل و سوات و مہمانداری نا بشخ آک اوار ء ُ۔ وزیراعظم قطری کاروباری راہشون تے حکومت پاکستان نا کنڈآن پاکستان اٹی کاروباری نظام ءِ گچین و اپ گریڈ کننگ کن کروک آ سخت پنجر جاتی و پالیسی اصلاحات آتیان ہم معلومدار کرے۔ دا وخت آ شیخ فیصل بن قاسم الثانی پاکستان تون تینا دیرینہ وابستگی تا ذکر ءِ کرے و ایسوسی ایشن نا پاکستان تون واپاری تعلقداری تے پین ودفنگ نا است خواہی نا درشانی ءِ کرے۔ دا بابت او وزیراعظم ءِ معلومدار کریر کہ او کمکاری نا کسر تے پٹنگ کن زوت کیو بی اے نا اسہ نمائندہ تکنیکی کہول آ ڈل اس پاکستان آ گدریفک۔ او ایسوسی ایشن نا سینئر باسک آتون وزیراعظم نا دورہ پاکستان نا سلہ ءِ ہم امنا کرے۔ پاکستان و قطر انا ہڑتوم آ کنڈآتا تعلقداری ٹی ودکی نا رفتار آ تران کرسا وزیراعظم کاروباری بشخ اٹی وارخواہی تیان فائدہ ہرفنگ نا رفتار ءِ برقرار تخنگ کن ہڑتوم آ ملک آتا نجی بشخ آتا کلیدی کڑد آ زور شاغا۔ اوخاص وڑاٹ ہڑتوم آ ملک آتا نیام اٹ کاروباری نا کمک اٹ رابطہ غاتے ودفنگ آ زور شاغا۔