دوحہ۔ 23 اگست (اے پی پی) وزیراعظم محمد شہباز شریف پاکستان و قطر انا نیام اٹ تین پہ تینی شرف، پت و مخ تفی آ مبنی تعلقداری تا خصوصی وڑءِ تالان کرسا قطری زرکارآتے پاکستان اٹ مونی بننگ کن تینا حکومت نا کنڈآن پورو کمکاری نا باوری کرفے و پارے کہ پاکستان نا جغرافیائی محل و وقوع اودے ڈیہہ نا اولین واپاری، توانائی وٹرانسپورٹ کوریڈور جوڑ کرینے۔ داخیال آتا درشانی ءِ او دوحہ ٹی ’’پاکستان قطر واپار و زرکاری گول میز2022‘‘ نا وخت آ پنی آ قطری و پاکستانی پوریاگر راہشون آتون گپ وتران کرسا کرے۔ قطر فنانشنل سینٹر، پاکستان بزنس کونسل قطر و دوحہ ٹی پاکستانی سفارت خانہ اسیجائی وڑاٹ گول میز کانفرنس نا بست وبند کریر۔ قطر انا وزیر خزانہ علی بن احمد الکواری ، انڈر سیکرٹری وزارت واپار و صنعت قطر سلطان بن راشد و سی ای او قطر فنانشل کنٹر یو سف الخطر جیدا ئسک ہم دا دود اٹی بشخ ہلکر۔ قطر انا سرکڑدہ کاروباری و کارپوریٹ ایگزیکٹوآتون اوار اوار قطر اٹی رہینگوک پاکستانی پوریاگر برادری نا بھلو کچ اس ہم بشخ ہلکر۔داوخت آ تینا تران اٹی وزیراعظم پاکستان و قطر انا نیام اٹ تین پہ تینی شرف، پت و مخ تفی آ مبنی تعلقداری تا خصوصی وڑ ءِ مون آتخا۔ اوقطر ءِ اسہ قابل پت پارٹنر اس گوندا ہرانا مخ تفی نا است انا حب اٹ ستاءِ کننگا۔ اومچ آ دنیا ٹی کبینی نا کچ و زرگزرانی تنگ دستی نا دور اٹی پاکستان نا سپورٹ آ قطر انا ستاءِ کرے۔ وزیراعظم پارے کہ ساڑی حکومت اسہ ہندن ءُ وخت اسے ٹی اقتدار ءِ سنبھالا ہراتم پاکستان ءِ بھلا زرگزرانی ، واپاری نسخان و وسیلہ غاتیا بھلو زور کون آ چیلنج آتا مون تروک ئسک۔ اومستی پارے کہ ایندھن تون اوار درآمد آتے کم کننگ نا اسٹ انگا کسر صنعتی پیدوار اٹی ودکی و قابل تجدید توانائی تے کاریم اٹ اتسا ملک انا برآمد آتے ودفنگ ءِ۔ ملک انا ہائیڈرو پاور نا بھلالائخی تے تالان کرسا وزیراعظم پارے کہ پاکستان خاص وڑاٹ قطری زرکارآتے دمدستی منافع کن پن بجلی نا پیدوار اٹی زرکاری آن فائدہ ہرفنگ کن درملکی زرکاری نا سلہ خلکونے۔ اوغانستان اٹی ثالثی نا کڑد آ قطر انا ستاءِ کرسا اوپارے کہ قطر نئے بیرہ اوغانستان بلکن ڈیہہ ٹی امن و اہم گرنچی ءِ مون آ دننگ کن تینا کڑد ءِ ادا کرینے۔ پینلسٹ اٹی وزیر واپارسید نوید قمر، وزیر مملکت خارجہ امور حنا ربانی کھر، کیو ایف سٹ نا چیف بزنس آفیسر الانودبن حمد الثانی، اعزازی زرکاری کونسلر محسن مجتبیٰ و پاکستان بزنس کونسل نا صدر ڈاکٹر جاوید اقبال ئسک ہم اوار ئسر۔
