وزیراعظم شہباز شریف قطر انا اِرادے ئی دورہ ءِ پورو کرسا اسلام آباد آ روانہ، قطری سرکڑدہ غاتون اوڑدہی ٹی تین پہ تینی واپار ءِ ودفنگ، ادارہ جاتی رابطہ غاتے سوگو کننگ آ امنا

دوحہ۔ 25 اگست (اے پی پی) وزیراعظم محمد شہباز شریف قطر انا اِرادے ئی اہم سرکاری دورہ ءِ پورو کننگ آن پد دوحہ غان اسلام آباد آ روانہ مس۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم ءِ دوحہ نا بالی پٹ آ قطر انا وزیر ٹرانسپورٹ جاسم سیف ال سلیطی رخصت کرے۔ وزیراعظم نا امیر قطر، قطری سرکڑدہ غاتا ایلو اہم راہشون، قطر انوسٹمنٹ اتھارٹی و پوریاگر آتون سرسہب اوڑدہی تیٹی قطر انوسٹمنٹ اتھارٹی پاکستان اٹی چندی واپاری و زرکاری نا بشخ آتیٹی 3 بلین امریکی ڈالر نا زرکاری نا تیاری کننگ ءِ۔ دورہ ٹی وزیراعظم قطر انا امیر شیخ تمیم بن حمدالثانی و قطر انا وزیراعظم شیخ خالد بن خلیفہ عبدالعزیز الثانی تون جتا جتا اوڑدہی کرے ہرافتے ٹی ہڑتوم آ کنڈآتا و تین پہ تینی  است خواہی نا امور آ گپ وتران کننگا و تین پہ تینی واپار ءِ ودفنگ کن ادارہ جاتی رابطہ غاتے سوگو کننگ آ امنا کننگا۔ داکان بیدس کشت وکشار، خور، توانائی نا بشخ آتیٹی کمکاری ءِ ودفنگ و پاکستان اٹ قابل تجدید توانائی، سیل و سوات و مہمانداری نا بشخ آتیٹی قطر انا زرکاری نا است بڈی آ امنا کننگا۔ وزیراعظم قطر انوسٹمنٹ اتھارٹی و بزنس ایسوسی ایشن نا ڈل اتون ہم اوڑدہی کرے۔ وزیراعظم تینا دورہ ٹی پاکستان۔ قطر ٹریڈ اینڈ انوسٹمنٹ  راؤنڈ ٹیبل کانفرنس اٹی ہم بشخ ہلک۔ کانفرنس اٹی قطر انا سرکڑدہ کاروباری و کارپوریٹ ایگزیکٹوز اتون دوحہ قطر اٹی رہینگوک پاکستانی پوریاگر برادری نا اسہ بھلو کچ اس بشخ ہلک۔ کانفرنس اٹی قطری پوریاگر و زرکارآک پاکستان اٹ چندی بشخ آتیٹی زرکاری ٹی است خواہی نا درشانیءِ کریر۔ وزیراعظم دوحہ ٹی فیفا ورلڈ کپ 2022 نا ہند 974 اسٹیڈیم نا دورہ ءِ ہم کرے۔ وزیراعظم اسٹیڈیم اٹی ساڑی آسراتی تا ستاءِ کرے و اسٹیڈیم نا یکتا تفنگ نا ستاءِ کرے و قطر اٹی فیفا ورلڈ کپ نا اڈتننگ آ قطر انا سرکڑدہ و الس کن نیک است خواہی نا درشانی و دا چرجوئی ٹی پاکستان نا پورو مخ تفی نا باور کرفے۔ وزیراعظم محمد شہباز شریف نا وزارت عظمیٰ نا منصب ءِ سنبھالنگ آن پد قطر انا دا اولیکو سرکاری دورہ ئسک۔