انٹرنیٹ نا دنیا ٹی مرسا ننے چندی بشخ آتیٹی کیہی چیلنج مون تروک ءِ، اوفتا مقابلہ ء، کننگ کن دمدستی گام گیج کننگ نا گرج ءِ، سینیٹر طلحہٰ محمود

اسلام آباد۔ 24 اگست (اے پی پی) بنجائی وزیر ریاستی و سیمی امور(سیفران) سینیٹر طلحہ محمود پارینے کہ اینو نن انٹرنیٹ نا دنیا ٹی رہینگ انگ اُن و ننے چندی بشخ آتیٹی کیہی چیلنج مون تروک ءِ ، دا چیلنج آتامقابلہ ءِ کننگ کن دمدستی گام گیج کننگ نا گرج ءِ۔ داخیال آتا درشانی ءِ او چارشنبے نادے آ پائیدار ساءبر سکیور پاکستان وژن 2030 نا سرحال آ نسٹ یونیورسٹی اسلام آباد اٹی اڈ ہلوک انٹرنیشنل کانفرنس آن بطور مہمان خاص تران کرسا کرے۔ بنجائی وزیر داوخت آ بروخت و اہم کانفرنس اٹی بشخ ہلنگ آ ملکی و درملکی بشخ ہلوک آتا ستاءِ کرے۔ بنجائی وزیر پارے کہ اینو نن انٹرنیٹ نا دنیا ٹی رہینگ انگ اُن۔ ننے قومی و جہانی کہول آ حقی دنیا ٹی سیاست، واپاری وارخواہی و سنگت آتون تعلقداری نا بشخ آتیٹی کیہی چیلنج مون تروک ءِ ۔ او کانفرنس نا چرجوئی ٹی کوشست کننگ آ مسکوہی ایڈیشنل ڈائریکٹر جنرل ایف آئی اے عمار جعفری نا کوشست آتا ستاءِ کرے۔ اوپاکستانی حکومت نا کنڈآن ملائیشیا غان بروک آ ڈاکٹرظاہری و اونا ٹیم انا منت واری ءِ ہرفے۔ اوپارے کہ داکانفرنس اٹی ملکی و درملکی ترانکارآک بشخ ہلنگ ءُ ہراٹی سائبر سیکورٹی نا چندی پلو آتے مون آ تخرہ ہرافتا دمدستی ایسری نا گرج ءِ۔ اوپارے کہ داکانفرنس اٹی سائبر سیکورٹی نا ایسری کن سلاہ و سوج شین تننگک۔ بنجائی وزیر درملکی مندوبین، ایف آئی اے و کانود نافذ کروک آ ایجنسی، یونیورسٹی و صنعتی چاہندار آتون اوار ایلو بشخ ہلوک کانفرنس اٹی بشخ ہلنگ آ منت واری ءِ ہرفے۔ اوپارے کہ داکانفرنس اٹی ورناک ہم ساڑی ءُ و دا سائبر سکیور پاکستان کن مثبت نشانی اسے۔ اوکانفرنس نا اڈتننگ آ نسٹ یونیورسٹی نا ہم منت واری ءِ ہرفے۔