وزیراعظم نا سلاہکار انجینئر امیر مقام تون کوہستان نا سیاسی  و السی سرکڑدہ غاتا متحدہ جرگہ نا اوڑدہی

اسلام آباد۔ 24 اگست (اے پی پی) وزیراعظم نا سلاہکار سیاسی و السی امور انجینئر امیر مقام تون کوہستان نا سیاسی و السی سرکڑدہ غاتا متحدہ جرگہ اوڑدہی کرینے۔ اوڑدہی ٹی چندی السی امور آ گپ وتران کننگا۔ وزیراعظم نا سلاہکار انجینئرامیر مقام سرکڑدہ غاتے واپڈا و ایلو السی ویل آتا بابت اوفتا غاو تے تعلقدار کمامدارآتون ہرفنگ و ایسر کننگ نا باوری کرفے۔ اوپارے کہ او دا ویل ءِ وزیراعظم شہباز شریف نا نوٹس اٹ ہم اتیک و وزارت بجلی تون ہم ہیت کیک۔ اوپارے کہ دا چرجوئی ٹی او واپڈا و وزارت بجلی تون میٹنگ اس ہم بٹنگک۔ جرگہ نا ستاءِ کرسا سلاہکار پارے کہ او تینا مخلوق نا خذمت کن ساڑی ءِ۔ کوہستان متحدہ جرگہ سرکڑدہ غاتیان تالان ئسک ہرافتے ٹی صلاح الدین، ملک سمندر خان، ملک مختیار، مولانا کریم داد، مولانا احمد علی، ایڈووکیٹ دیدار خان، محمد اللہ جان و ایلوفک اوار ئسر۔ جرگہ نا باسک آک وزیراعظم ناسلاہکار ءِ واپڈا تون معاہدہ نا بابت معلومدار کرے۔ اوفتا پاننگ ئسک کہ معاہدہ نا رداٹ واپڈا ءِ اُراتے اڑزآن نرخ آتیا بجلی فراوان کننگ ئسک، پٹن گریڈ اسٹیشن نا لائخی ءِ ساڑی آ 25 کے وی آن ودفسا KV132کروئی ئسک و ہندی مخلوق ءِ شیفکو درجہ نا عہدہ غاتیا بھرتی کروئی ئسک۔ ولے ہچ ءُ فائدہ اس متو۔