وزیراعظم محمد شہباز شریف نا امیر قطر نا باوہ شیخ حمد بن خلیفہ ال ثانی و لمہ موزہ بنت نصر تون اوڑدہی

دوحہ۔ 24 اگست (اے پی پی) وزیراعظم محمد شہباز شریف امیر قطر انا باوہ شیخ حمد بن خلیفہ ال ثانی و لمہ موزہ بنت نصر تون چارشنبے نادے آ  اوڑدہی کرے وہڑتوم آ برادر ملک آتا نیام اٹ تعلقداری تے سوگو کننگ کن اوفتا کڑد انا ستاءِ کرے۔ وزیراعظم آفس نا میڈیا ونگ آن جاری بیان نا رداٹ وزیراعظم تینا و تینا ڈل انا جم وجوش اٹ بخیر کننگ آ امیر قطر نا باوہ نا منت واری ءِ ہرفے، اوفتے کن نیک است خواہی نا درشانی ءِ کرے و تین پہ تینی پت و مخ تفی نا سوگو بنداو آ جوڑ قطر اتون دیرینہ و خڑکی تعلقداری تے پاکستان نا کنڈآن تروک آ اہمیت نا ذکر ءِ کرے۔ 1999و 2017ٹی امیر قطر نا باوہ نا پاکستان نا دورہ غاتا ذکر ءِ کرسا وزیراعظم ہڑتوم آ ملک آتا نیام اٹ تعلقداری تے سوگو کننگ کن اوفتا کڑد انا ستاءِ کرے و اوفتا دور اٹی ہڑتوم آ کنڈآتا تعلقداری ٹی سوگوی  ءِ امنا کرے۔ امیر نا قطر انا لمہ شیخہ موزہ بنت نصر نا سرپرستی ٹی ’’ تعلیم غٹ آن ود ‘‘ پروگرام نا ذکر ءِ کرسا وزیراعظم انسانی ہمدردی و خیراتی سرجزآتیکن اونا کوشست و پاکستان تون اوار مچ آ دنیا ٹی خاص وڑاٹ اسکول آن پیشن چناتا داخلہ کن خذمت آتا ستاءِ کرے۔ وزیراعظم قطر و پاکستان نا شونداری ٹی کڑد ادا کروک آ قطر اٹی رہینگوک 2 لکھ آن زیات پاکستانی تا مہمانداری آ امیر قطر انا باوہ نا منت واری ءِ ہرفے۔ وزیراعظم قطر انا وژن 2030 نا بابت قطر اتون پین کمکاری نا باور کرفے۔ وزیراعظم فیفا ورلڈ کپ 2022 نا مہمانداری آ قطر اکن خیرخواہی نا جوزہ و نیک است خواہی نا درشانی ءِ کرے۔ وزیراعظم اوفتے پاکستان نا دورہ ءِ کننگ نا سلہ ہم خلک۔