اسلام آباد۔ 23 اگست (اے پی پی) چیئرمین سینیٹ صادق سنجرانی ءِ ٹیکی ٹی تروک آ فن پارہ ءِ پارلیمنٹ ہائوس نا گیٹ نمبر ون نا زیب و زینت جوڑ کننگا۔ سینیٹ سیکرٹریٹ نا رداٹ فن پارہ ٹی کلمہ طیبہ ءِ دائرہ نا دروشم اٹ خط کوفی ٹی نوشتہ کننگا و ولدا دا فن پارہ نا دروشم اٹ جوڑ کننگا۔ کلمہ طیبہ ءِ دا فن پارہ ٹی چار وار نوشتہ کننگانے۔ دا فن پارہ ٹی لین تہہ آن پیشن نا کنڈ شعاع تیانبار ءِ و دا فن پارہ نا گول مننگ ننا ڈغار ءِ ظاہر کیک۔ دا فن پارہ داہیت انا پیدواری ءِ کیک کہ اللہ و اللہ نا رسول خواجہ محمد ﷺ نا کلہو (اسلام ) مچ آ دنیا ٹی تالان مسنے و پین تالان مننگ ءِ۔ دا فن پارہ فائبر گلاس آن جوڑ کننگانے و داٹی پیتل نا ٹکر خلنگانے۔ پیتل نا رنگ خیسن آنبار ءِ ہراکہ دا فن پارہ ٹی علم انا دولت ءِ ظاہر کیک۔ دافن پارہ غا کروک آ پیہن رنگ ڈیکوپینٹ ءِ ہراکہ ہرموسم نا سختی ءِ سگنگ کیک۔ دافن پارہ نا سائز 4 x 4ءِ۔ دا فن پارہ ءِ جوڑ مننگ اٹ 8 تُو انا وخت لگا۔ دافن پارہ ٹی ہندی خطاط ناصر جاوید کلمہ طیبہ ءِ زیبائی اٹ جوڑ کرے۔ ناصر جاوید دا فن پارہ ءِ چیئرمین سینیٹ محمد صادق سنجرانی ءِ بطور ٹیکی تس ہرادے چیئرمین سینیٹ نا پارت آ پارلیمنٹ ہائوس نا بلڈنگ ناگیٹ نمبر ون آ خلنگانے۔ خلوک آ فن پارہ مخلوق کن مرکز نگاہ جوڑ مسنے۔
