اسلام آباد۔ 23 اگست (اے پی پی) بنجائی وزیر چاگڑدی بدلی سینیٹر شیری رحمان پارینے کہ پِر تا پوسکن آ چرجوئی نا 26 اگست اسکان برجاسلنگ نا گمان ءِ، ننے نوکاپ زدگان آتا کمک کن غٹ وسیلہ غاتے کاریم اٹ اتوئی مریک، نوکاپ نا بھسکاری تتون مون تننگ کن غٹ صوبہ غاتے پین وسیلہ غاتا گرج ءِ۔ سے شنبے نادے آ تینا اسہ بیان اسے ٹی اوپارے کہ نیشنل ڈیزاسٹر مینجمنٹ اتھارٹی (این ڈی ایم اے ) نا جولائی آن 22 اگست نارپورٹ نا رداٹ پڈعیدن و کراچی ٹی 30 سال اٹی غٹ آن زیات پِر ریکارڈ کننگانے، سندھ انا غٹ ضلع غاک داوخت اٹی غٹ آن زیات طوفانی پِر تا مون اٹی ئسر۔ اوپارے کہ پِر و نوکاپ نا چرجوئی پین ترند مرسا کننگ ءِ، وزارت ماحولیاتی بدلی بشام نا ترند انگا پِر تا بابت بنجائی و صوبائی حکومت آتے خبڑدار کریسس، نوکاپ نا بھسکاری تتون مون تننگ کن غٹ صوبہ غاتے پین وسیلہ غاتا گرج ءِ۔ اوپارے کہ لکھ آ نوکاپ زدگان ریلیف نا چاری ءُ۔ سویل پنجاب نا مخلوق صوبائی حکومت نا کنڈآ ہُننگ ءُ ولے افسوس ءِ کہ پنجاب حکومت نا غٹ تر چکار شہباز گل و عمران خان نا کنڈآٹے، داوخت ملک انا غٹ آن بھلا ویل شہباز گل نا دزگیری اف بلکن نوکاپ و اوڑآن زہمی لکھ آ مخلوق ءِ۔
