اسلام آباد۔ 23 اگست (اے پی پی) بنجائی وزیر قومی جان جوڑی عبدالقادر پٹیل پارینے کہ وزارت جان جوڑی دا مشکل ساہت اٹی نوکاپ زدگان آتون تفوک ءِ، نوکاپ زدگان آتیکن پگہ ڈونر آتا دیوان اس بٹنگ اُن، ساڑی آ نوکاپ نا سوب آن بھسکاری مسنے، نیشنل ایمرجنسی آ بایدے ہچ ءُ سیاست اس مف۔ سے شنبے نادے آ میڈیا تون گپ وتران کرسا اوپارے کہ ساڑی آ نوکاپ نا سوب آن بھسکاری مسنے ، وزارت جان جوڑی مشکل ساہت اٹی نوکاپ زدگان آتون تفوک ءِ۔ اوپارے کہ ضلع لسبیلا ٹی ڈاکٹر آتا 12 باسکی ٹیم اس گدریفنگاسس۔ ویکسین نا سی ہزار، دوائی تا اسہ لکھ خور آتا ٹرک اس مہالو گدریفین، ویکسین نا پین اِرا لکھ خور گدریفنگانے۔ اوپارے کہ بلوچستان ءِ 36 ہزار میڈیکیٹڈ مچھر دانی تسونن ، پین 14 لکھ پیپ لین اٹی ءُ۔ سندھ اکن شش لکھ مچھر دانی مسہ دے اسکان گدریفنگانے۔ یک و نیم کروڑ روپئی نا پین دوائی بلوچستان و سندھ آ گدریفنگ اُن۔ دوشہ کُننگ نا ویکسین بھلو کچ اسے ٹی ساڑی ءِ۔ زالبول آتیکن ڈلیوری کٹس گدریفنگ اُن۔ اوپارے کہ نوکاپ زدگان آتیکن پگہ ڈونر آتا دیوان اس بٹنگ اُن۔ لسبیلا ڈسٹرکٹ نا انفراسٹرکچر پورو وڑاٹ بھس مسنے۔ بھسکاری ءِ حکومتی کہول آ تنیا ایسر کننگ کپنہ۔ نیشنل ایمرجنسی آ بایدے ہچ ءُ سیاست اس مف۔ ایمرجنسی نا حالیت آتیا سیاست آ بایدے شرم برے۔ سیاست ءِ الر نوکاپ نا خلوک آتا کمک ءِ کیر۔ پنجاب راجن پور و ڈیرا غازی خان کن طبی امداد خواہسنے۔ خیبرپختونخوا نا کنڈآن داتم اسکان کمک نا پاننگتنے۔ خیبرپختونخوا تون اوار ہرا صوبہ ہم پاہک اونا کمک ءِ کننگک۔
