دوحہ۔23اگست (اے پی پی): مزن وزیر محمد شہباز شریف ءَ گوشت کہ پاکستان گتر ءِ گوما روایتی نزیکیں سیاسی یکوئی آناں ٹوھیں اقتصادی شریکداری ءِ تہ ءَ مٹ کنگ ءِ واھشت ایگ انت، دوئیں ملک آنی نیام ءَ بالی، جہاز جوڑ کنگ، صنعتی ءُ بنیاتی کوکا ءِ دیمروئی ءُ ھاٹیگ ء، شوبگ آنی تہ ءَ دو نیمگی اقتصادی ءُ سرمایہ کاری ءِ رابطہ آناں دیمروئی دیگ ءِ ضلورت انت، گتر ءِ سرمایہ کار پاکستان ءِ آزاتی ءَ گوں سرمایہ کار دوستیں پالیشی آں چہ سیت چست کنان ءَ کشت ءُ کشار، لائیو سٹاک، سیل ءُ سواد ءُ ایندگر شوبگ آنی تہ ءَ سرمایہ کاری بکن انت۔ اے ھیالانی درشانی آئی ءَ سئے شمبے ءِ روچ ءَ ادا گتر انویسٹمنٹ اتھارٹی ءِ چیف ایگزیکٹو اپسرگ منصور بن ابراہیم المحمود ءُ چیف انویسٹمنٹ اپسرگ برائے افریقہ ءُ ایشیا پیسیفک ریجنز شیخ فیصل ثانی آل ثانی ءِ ھوار ءَ گتر انویسٹمنٹ اتھارٹی ءِ ڈل ءَ گوں گند ءُ نند ءِ ساھت ءَ تران کنان ءَ کت۔ گتر انویسٹمنٹ اتھارٹی دگنیا ءِ درستاں چہ مسترین، وت مستریں ویلتھ فنڈز آنی تہ ءَ یک ات۔ دو روچی سرکاری تر ءُ تاب ءَ دوحہ ءَ پجگ ءِ زوتاں پد مزن وزیر ءِ ایش اولی دزگٹی بوتگ۔ کابینہ ءِ ارزشتی ایں باک ءُ کلانہ ایں کارندہ مزن وزیر ءِ ھمبراہ اتنت۔ امیر گتر ءِ دور چاریں سروک آں گتر ءِ ترندیں اقتصادی دیمروئی ءَ را ساڑاھان ءَ مزن وزیر ءَ گوں اے گپ ءِ جزم کت کہ پاکستان گتر ءِ گوما وتی یکوئی آناں سک باز ارزشت دنت ءُ دوئیں ملک آنی نیام ءَ روایتی سیاسی یکوئی آناں یک ٹوھیں اقتصادی شریکداری ءِ تہ ءَ مٹ کنگ ءِ واھشت ائیگ انت۔ مزن وزیر ءَ سولر ھاٹیگ، گوات ءَ چہ توان پیداک کنگ، بالی ، جہاز جوڑ کنگ، صنعتی ءُ بنیاتی کوکا ءِ دیمروئی ءُ مہمان نوازی ءِ شوبگ ءَ ھوار ھاسیں رنگ جوانیں ھاٹیگ ءِ شوبگ ءَ دو نیمگی اقتصادیءُ سرمایہ کاری رابطہ آناں گیش دیمروئی دیگ ءِ ضلورت ءِ سر ءَ زور پر دات۔ مزن وزیر ءَ گتر انویسٹمنٹ اتھارٹی ءَ را ساپ ءُ سلہ ءُ ترندی ءِ گوما جیڈھ آناں گیش ءُ گیوار کنگ ءِ ھوالگ ءَ سرجمیں آسراتی پجاری کنگ ءِ ھم دل یکیمی کنائینت۔ سیادی داروکیں وزارت ءِ نیمگ ءَ پاکستان ءَ فوڈ سیکورٹی، ھاٹیگ، جہاز جوڑ کنگ، بالی، مہمان جھلی ءُ سیل ءُ سواد ءِ شوبگ ءَ گیر ملکی سرمایہ کار ءِ موہ آناں سہرا کنگ بوت۔ مزن وزیر ءَ پاکستان ءَ سرمایہ کاری ءِ واستہ گتر انویسٹمنٹ اتھارٹی ءِ واھگ آناں ساڑات۔ گند ءُ نند ءَ اے گپ ءِ سر ءَ تپاک کنگ بوت کہ دوئیں نیمگ ءَ نامینتگیں نماھندگ سرمایہ کاری ءِ واستہ ارزشتی ایں شور ءُ مشور آنی ھوالگ ءَ نزیکیں رابطہ آناں برجا داراں۔ مزن وزیر منصور بن ابراہیم المحمود ءُ شیخ فیصل ثانی آل ثانی ءَ را پاکستان ءِ تر ءُ تاب ءِ دعوت دات۔ گتر انویسٹمنٹ اتھارٹی ءِ ڈل ءَ پاکستان ءَ را وتی اول سرئی نامینان ءَ پاکستان ءَ سرمایہ کاری ءُ سرمایہ کاری ءِ موہ پٹءُ پول کنگ ءَ جھلانکیں واھگ دارگ ءِ درشان کت۔
