اسلام آباد۔ 23 اگست (اے پی پی) وزیراعظم محمد شہباز شریف پارینے کہ پاکستان قطر اتون تاریخی ہڑتوم آ کنڈآتا تعلقداری تے پین سوگو سٹریٹجک تعلقداری ٹی بدل کننگ خواوہ، کنا دورہ قطر آن ہڑتوم آ ملک آتا نیام اٹ ایلمی و سنگتی نا رشتہ پوسکن مریک۔ سے شنبے نادے آ تینا ٹویٹ اٹی وزیراعظم پارے کہ تینا ایلم شیخ تمیم بن حمد الثانی نا سلہ غا قطر روانہ مننگ اُٹ۔ دا دورہ ہڑتوم آ ایلم ملک آتا نیام اٹ ایلمی و سنگتی نا رشتہ ءِ پوسکن کیک۔ نن تینا تاریخی ہڑتوم آ کنڈآتا تعلقداری تے پین سوگو سٹریٹجک تعلقداری ٹی بدل کننگ خوانہ۔ اوپارے کہ زرکار و کاروباری راہشون آتون گپ وتران اٹی پاکستان اٹی قابل تجدید توانائی ، خور انا رکھ، صنعتی و بنداوی پنجر نا شونداری، سیل و سوات و مہمان نوازی کون آ چندی بشخ آتیٹی زرکاری نا پرکشش وارخواہی تے تالان کیوہ۔ دورہ نا رد ءِ پہہ مننگ المی ءِ۔ دنیا کوویڈ۔ 19 نا جہانی دین آن زہمی زرگزران نا بحالی ٹی سست روی تون مون تننگ ءِ۔ جغرافیائی و سیاسی بے چیٹی طلب ورسد ءِ زہمی کرینے و ودوک آ توانائی و خور انا نہاد آک ویل آتیٹی پین ودکی کرینو ۔ ننا اسیجائی چیلنج کمکاری کن پوسکن ءُ کسر پٹنگ نا خواست کیک۔
