اسلام آباد۔ 23 اگست (اے پی پی) وزیراعظم شہباز شریف نوکاپ زہمی تا کمک کن خواست کرسا پارینے کہ بلوچستان و سندھ اٹی قیامت صغریٰ نا منظر ءِ، حکومت نوکاپ زدگان تا کمک و بحالی کن دے و نن کاریم کننگ ءِ، زہمی تیکن کھرب آ روپئی نا گرج ءِ، قوم مصیبت زدہ ایلم تا کمک کن است انا حب اٹ عطیہ ایتے۔ سے شنبے نادے آ وزیراعظم محمد شہباز شریف قوم آن نوکاپ زدگان تا کمک کن امداد نا خواست کرے۔ تینا کلہو اٹی وزیراعظم پارے کہ ملک اٹی پِر تا 30 سال انا ریکارڈ پِننگ آن خاص وڑاٹ بلوچستان و سندھ اٹی بھسکاری آن قیامت صغریٰ نا منظر ءِ۔ سد آ پاکستانی نوکاپ نا بے رحم جول آتا گواچی مرسا تینا پد اٹ جتائی نا غم تے اِلانو۔ سد آ ٹھپی مروک آتا دراخ جوڑی کن دعا کینہ۔ بھاز بھلو کچ اسے ٹی مخلوق بے اُراءِ، ساہدار، فصل، باغ و ملکیت آتے نسخان رسینگانے۔ صوبائی حکومت، بنجائی و صوبائی ادارہ و سلہہ بند فوج انا پبی کمک اٹ نن غٹ اواری اٹ دے و نن کاریم کننگ اُن۔ جم وڑاٹ37.2 ارب روپئی نوکاپ زدگان تیکن تننگ انگ ءِ۔ ای دمدستی 5 ارب روپئی نا زر این ڈی ایم اے ءِ جاری کرفینٹ تانکہ ریسکیو، ریلیف و بحالی نا گام گیج آتیٹی ترندی برے۔ ہر زوال کروک آ بندغ ناخاہوت ءِ 10 لکھ، ٹھپی، اُراتا تمنگ و ایلو نسخان تا زرتلافی آن بیدس زہمی تے 25 ہزار روپئی نغد انا زرتس بھلو کچ اسے آ برجاءِ ہراڑکن 80 ارب روپئی آن زیات درکار ءِ۔ کھرب آ روپئی نا نسخان تے پورو کننگ و زہمی تا بحالی کن کھرب آ روپئی نا گرج ءِ۔ دا غٹ گام گیج ننا فرض ءِ ہرادے نن خواری، دیانتداری و غم گساری نا جوزہ اٹ سرتننگ اُن۔ سڑک و پول آتے دیر دننگ آن ڈغاری رابطہ نا کشکنگ آ ہیلی کیپٹر آتیان کمک ہلنگ انگ ءِ۔ اہل وطن نا کمک نا کوشست آتیٹی پاک آرمی نا آفیسر آک شہیدی نا جام ءِ نوش کرسا قربانی نا عظیم جوزہ نا روشنا مثال اس قائم کرینو۔ 2005 نا قیامت خیز زمی جمب و 2010 نا تباہ کن نوکاپ نا وخت آ ہم الس و ادارہ غاک مصیبت اٹی تموک پاکستانی تیکن ایثار و قربانی نا ہنداوڑ عظیم جوزہ سے اٹ دنیا ٹی مثال اس جوڑمسوسر۔ مچ آ قوم مون آ برسا دوتے سبک کے تو نن کیہی گنازیات رفتار اٹ زہمی تا زوت کمک و بحالی ٹی سرسہب مننگ کینہ۔ ایثار و قربانی ٹی ننا قوم دنیا ٹی غٹ آن مون آٹے۔ ای نمے آن کمک نا خواست کیوہ۔ آقا کریم ﷺ آن ود ننکن ہچ ءُ مثال اس مننگ کپک، ہرانا مہرومریبت اٹی انصار مصیبت زدہ ایلم تا ڈکھ آتے بشخاسس۔ نوکاپ زدگان تا کمک کن جوڑ فنڈ اٹی است انا حب اٹ عطیہ جمع کرفر۔ ببو! مصیبت زدہ ایلم تا انصار مدینہ آنبار کمک ءِ کین۔ تانکہ محشر نا مشکل ساہت اٹی اللہ تعالیٰ ننے آ رحم کے۔
