اسلام آباد۔ 22 اگست (اے پی پی) وزیراعظم محمد شہباز شریف قطر انا امیر شیخ تمیم بن حمد الثانی نا سلہ غا 23 آن 24 اگست قطر انا اِرادے ئی سرکاری دورہ ءِ کیک۔ ترجمان دفترخارجہ نا کنڈآن دوشنبے نادے آ داڑے جاری بیان نا رداٹ داسال اپریل اٹی وزارت عظمیٰ نا منصب ءِ سنبھالنگ آن پد وزیراعظم محمد شہباز شریف نا قطر انا دا اولیکو دورہ مریک۔ وزیراعظم تون کابینہ نا اہم باسک آتون اوار اسہ بڑزکو کہولی ڈل اس ہم مریک۔ دورہ ٹی وزیراعظم قطر انا سرکڑدہ غاتون ہڑتوم آ ملک آتا تعلقداری آ سلابت کیک۔ ہڑتوم آ فریق آک ہڑتوم آ کنڈآتا تعلقداری تا غٹ پلو آتا جاچ ءِ ہلیرہ ، توانائی نا بابت کمکاری ءِ مون آ دننگ، واپاری و زرکاری تعلقداری تے ودفنگ و قطر اٹی پاکستانی تیکن روزگار نا گیشتر وارخواہی پٹنگ آ خاص چکار کننگک۔ او تین پہ تینی است خواہی نا چندی علاقائی و جہانی امور آ ہم گپ وتران ککیک۔ وزیراعظم محمد شہبازشریف دوحہ ٹی قطری و پاکستانی پوریاگر، زرکار و کاروباری شخصت آتون ہم اوڑدہی کیک۔ وزیرا عظم دوحہ ٹی اسٹیڈیم 974 نا ہم دورہ ءِ کیک ہراڑے اودے فیفا ورلڈ کپ انا مہمانداری کن قطر انا حکومت نا کنڈآن کروک آ گیشتر تیاری تا بارواٹ حوال تننگک۔ پاکستان و قطر انا نیام اٹ خڑکی و خوشگوار برادرانہ تعلقداری ءِ ہرا اسیجائی مذہبی ، تین پہ تینی پت و افہام و تفہیم و خڑکی کمکاری آ مبنی ءِ۔ ہڑتوم آ ملک آتا نیام اٹ تعلقداری ہڑتوم آ کنڈآتا است خواہی نا غٹ بشخ آتیٹی ودوک آ کمکاری تون اوار اوار علاقائی و جہانی ویل آتیا خڑکی ہم آہنگی ءِ۔ قطر اٹی اِرا لکھ آن زیات پاکستانی ہم رہینگ انگ ءُ ہرا ہڑتوم آ ایلم ملک آتا شونداری، شونہالی و اقتصادی شونداری ٹی تینا کڑد ءِ ادا کننگ ءُ۔ سرکڑدہ غاتا کہول آ باقاعدہ دورہ پاکستان و قطر انا شریداری نا درستی راستی ءِ۔ وزیراعظم نا دورہ قطر آن ہڑتوم آ ملک آتا نیام اٹ چندی بشخ آتیٹی کمکاری ءِ ودفنگ و اوفتا ودوک آ اقتصادی شریداری ءِ پین سوگوی ملک۔
